Howa şertleri boýunça ýurdumyzyň beýleki sebitlerinden ýygym möwsümi biraz gijiräk badalga alýan Daşoguz welaýatynyň kärendeçileri hormatly Prezidentimiz Gurbanguly Berdimuhamedowyň tabşyrygyna laýyklykda, şu gün pagta ýygymyna girişdiler. Welaýatyň häkimliginde geçirilen iş maslahatynyň esasy meselesi ýygym möwsümini, ähli degişli gulluklaryň takyk işlemegini we sazlaşykly hereket etmegini guramaçylykly geçirmek boýunça wezipeleri ara alyp maslahatlaşmakdan ybarat boldy. Demirgazyk sebitde pagta ýetişdirilen meýdan 140 müň gektardan ybaratdyr. Şonça meýdandan “ak altynyň” 230 müň tonnasyny ýygnap almak maksat edinilýär. Welaýatyň ýer eýeleri pagtanyň “Daşoguz-120”, “Serdar”, “C-4727”, “Jeýhun”, “149F” we beýleki orta süýümli görnüşlerini has köp ekdiler. Häzirki zamanyň oba hojalyk tehnikalary meýdan işleriniň üznüksiz depginini üpjün eder. Meýdanlara ýokary öndürijilikli kombaýnlar, esasan, “Jhon Deere” we “Keýs” çykaryldy, pagtany daşamakda bolsa ýük awtoulaglaryň hem-de tirkegli traktorlaryň örän köp sanlysy ulanylýar. Kabul ediş nokatlar we pagta arassalaýjy zawodlar gije-gündizleýin işlemäge doly taýýar edildi. Olaryň ýanynda döwrebap enjamlar bilen enjamlaşdyrylan barlaghanalar bardyr. Şol ýerde “Türkmenstandartlary” Baş döwlet gullugynyň hünärmenleri tabşyrylýan çig malyň hilini barlaýarlar. Pagta ýygymynyň başlanmagy mynasybetli dabaralara welaýat we etrap häkimlikleriniň, daýhan birleşikleriniň ýolbaşçylary, şeýle hem jemgyýetçilik guramalaryň wekilleri, alym oba hojalykçylar, tejribeli agronomlar, kombaýnçylar, sürüjiler we kärendeçi pagtaçylar gatnaşdylar. Ýaşulular Watanymyzyň gülläp ösmegini, milli Liderimiz Gurbanguly Berdimuhamedowyň, baş saglygyny, ähli türkmen halkynyň abadançylygyny Beýik Biribardan dileg edip, aýat-doga okadylar hem-de “Harmanyňyza bereket!” diýen sözler bilen pagta ýygym möwsümine başlap berdiler. Soňra Döwlet baýdagymyz bilen, halylar we şygarlar ýazylyp bezelen üsti “ak altyndan” doly awtoulaglar hem-de tirkegli traktorlar Köneürgenç etrabynda ýerleşen pagta arassalaýjy zawoda ugradylar. Dabaralaryň çäklerinde çärä gatnaşyjylar “Köneürgenç” Döwlet taryhy-medeni goraghanasynyň çäklerinde ýerleşen binagärlik ýadygärliklerine hem baryp gördüler. Oba hojalyk tehnikalarynyň hem-de welaýatyň obasenagat toplumy tarapyndan öndürilen önümleriň sergisi guraldy. Welaýatyň aýdym-saz we tans-halk döredijilik toparlary ajaýyp konsert taýýarladylar. Sportuň milli görnüşleri boýunça ýaryşlar baýramçylyga gatnaşyjylarda uly gyzyklanma döretdi.