Geçen hepdäniň wakalarynda Gahryman Arkadagymyz tarapyndan başy başlanyp, hormatly Prezidentimiziň baştutanlygynda yzygiderli durmuşa geçirilýän döwlet syýasatynyň ileri tutulýan ugurlary — ýurdumyzy hemmetaraplaýyn ösdürmek boýunça milli maksatnamalaryň amala aşyrylmagy, parahatçylyk söýüjilik, hoşniýetli goňşuçylyk, deňhukuklylyk ýörelgeleri arkaly netijeli halkara hyzmatdaşlygyň işjeňleşdirilmegi, ruhy gymmatlyklaryň aýawly saklanylmagy, milli medeni mirasyň dünýäde wagyz edilmegi ýaly wezipeler öz beýanyny tapdy.

Ýurdumyzyň oba hojalyk toplumynda we welaýatlarda alnyp barylýan işler döwlet Baştutanymyzyň 27-nji aprelde sanly ulgam arkaly geçiren iş maslahatynda ara alnyp maslahatlaşyldy. Hormatly Prezidentimiz oba hojalyk pudagynyň öňünde duran möhüm wezipelere ünsi çekip, gowaça ekişini agrotehniki möhletlerde tamamlamagyň, bugdaýa ideg işleriniň ylmy taýdan esaslandyrylan kadalara laýyklykda ýerine ýetirilmeginiň, galla oragyna guramaçylykly taýýarlyk görmegiň zerurdygyny nygtady we bu babatda anyk tabşyryklary berdi. Döwlet Baştutanymyz şu ýyl welaýatlarda ulanmaga berilmegi meýilleşdirilen dürli maksatly desgalardaky gurluşyk işleriniň ýokary hilli, öz wagtynda ýerine ýetirilmegini gözegçilikde saklamagy tabşyrdy.

29-njy aprelde hormatly Prezidentimiz ýurdumyza sapar bilen gelen Seýşeller Respublikasynyň daşary işler we diaspora ministri Barri Fory kabul etdi. Duşuşygyň dowamynda abraýly halkara guramalaryň, ilkinji nobatda, Birleşen Milletler Guramasynyň çäklerindäki özara hyzmatdaşlyga üns çekildi. Şunuň bilen baglylykda, hormatly Prezidentimiz Türkmenistanyň döredijilikli başlangyçlaryny goldaýandygy we BMG-niň Baş Assambleýasynyň möhüm Kararnamalarynyň awtordaşy bolup çykyş edýändigi üçin Seýşeller Respublikasynyň Hökümetine minnetdarlyk bildirdi. Duşuşygyň barşynda taraplar iki ýurduň arasyndaky söwda-ykdysady hyzmatdaşlygy ýola goýmagyň mümkinçiligini ara alyp maslahatlaşdylar. Döwlet Baştutanymyz milli ykdysadyýetimiziň eksport kuwwatyna ünsi çekip, ýangyç-energetika toplumyny, himiýa we dokma senagatyny, oba hojalygyny geljegi uly ugurlaryň hatarynda görkezdi, şeýle-de seýşeller tarapyny ýurdumyzda geçirilýän sergilere, halkara maslahatlara işjeň gatnaşmaga çagyrdy.

1-nji maýda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň mejlisini geçirdi. Onda şu ýylyň dört aýynda ýurdumyzda alnyp barlan işleriň jemleri jemlenildi.

Bellenilişi ýaly, hasabat döwründe jemi içerki önümiň ösüşi 6,3 göterim artdy, şol sanda ösüş depgini senagat pudagynda 2,4 göterime, gurluşykda 6,2 göterime, ulag-aragatnaşyk pudagynda 10,3 göterime, söwdada 7,9 göterime, oba hojalygynda 2,2 göterime, hyzmatlar ulgamynda 8,4 göterime deň boldy. Geçen ýylyň degişli döwri bilen deňeşdirilende, şu ýylyň ýanwar — aprel aýlarynda jemi öndürilen önüm 10,4 göterim artyp, ykdysadyýetiň pudaklarynda oňyn önümçilik netijeleri gazanyldy. Hasabat döwründe bölek satuw haryt dolanyşygy 9,9 göterim, daşary söwda dolanyşygy bolsa 9,2 göterim artdy. Geçen dört aýyň jemleri boýunça Döwlet býujetiniň girdeji böleginiň meýilnamasy 100,2 göterim, çykdajy böleginiň meýilnamasy 97,6 göterim ýerine ýetirildi.

Hasabat döwründe býujetden maliýeleşdirilýän we hojalyk hasaplaşygyndaky döwlet kärhanalarynda zähmet haklary, pensiýalar, döwlet kömek pullary, talyp haklary öz wagtynda maliýeleşdirildi. Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi, geçen ýylyň degişli döwri bilen deňeşdirilende, 5 göterim ýokarlandy. Şeýle hem mejlisde şu ýylyň maý aýynda ýurdumyzyň gatnaşmagynda daşary döwletlerde geçirilmegi meýilleşdirilýän halkara ähmiýetli çäreler barada maglumat berildi.

Türkmenistan bilen Russiýa Federasiýasynyň arasyndaky strategik hyzmatdaşlygy mundan beýläk-de ösdürmek maksady bilen, Gahryman Arkadagymyzyň ýolbaşçylygynda ýurdumyzyň wekiliýetiniň Tatarystan Respublikasynyň Kazan şäherine sapary meýilleşdirilýär. Şunuň bilen baglylykda, Kazanda birnäçe möhüm halkara duşuşyklar geçiriler. Şolaryň hatarynda her ýyl geçirilýän “Russiýa — Yslam dünýäsi: KazanForum” atly halkara ykdysady forumy görkezmek bolar. Şeýle-de “Russiýa — Yslam dünýäsi hyzmatdaşlyk EXPO”, “Halkara emläk bazary” atly sergiler we maslahatlar, “Kazan halal bazary” halkara ýarmarkasy, “Asylly moda güni” festiwaly geçiriler.

Atly sport boýunça hem ýaryşlar guralar. «Garaşsyz, baky Bitarap Türkmenistan — bedew batly at-myradyň mekany» şygary astynda geçýän şu ýylda geçirilmegi olaryň aýratyn ähmiýetini görkezýär. Beýik Britaniýanyň London şäherinde ýurduň Patyşa maşgalasy tarapyndan Windzor halkara atly oýunlaryň we atly ýaryşlaryň geçirilmegi meýilleşdirilýär. Bu çäreleriň çäklerinde türkmen wekiliýetiniň gatnaşmagynda ahalteke bedewlerine we türkmen atşynaslyk däplerine bagyşlanan sergini guramak göz öňünde tutulýar.

Şeýle hem mejlisde 9-10-njy maýda Özbegistan Respublikasynyň Daşkent şäherinde “Gündogaryň merjeni” ady bilen geçiriljek atly sport we gözellik bäsleşiklerine, “Ahalteke bedewi — halklaryň dostlugynyň nyşany” atly maslahata gatnaşmak ugrunda zerur işleriň alnyp barylýandygy aýdyldy. Bu çäreler behişdi bedewlerimiziň şan-şöhratyny has-da belende galdyrmaga ýardam eder. Mundan başga-da, hormatly Prezidentimiziň we Gahryman Arkadagymyzyň ýakyndan goldaw bermegi esasynda türkmen wekiliýetiniň Baku şäherinde Azerbaýjan Respublikasynyň Hökümeti tarapyndan Birleşen Milletler Guramasynyň Ilatly nokatlar boýunça maksatnamasy (UN-Habitat) bilen bilelikde geçiriljek Şäherleriň bütindünýä forumynyň 13-nji mejlisine gatnaşmagynyň meýilleşdirilýändigi barada aýdyldy.

Hormatly Prezidentimiz şu ýylyň dört aýynda ýerine ýetirilen işleriň jemini jemläp, geçen döwürde gowy netijeleriň gazanylandygyny, ýurdumyzy ösdürmäge gönükdirilen maksatnamalaryň üstünlikli durmuşa geçirilýändigini, ykdysadyýetimiziň ähli pudaklarynda özgertmeleriň netijeli alnyp barylýandygyny, önümçilik pudaklarynyň yzygiderli döwrebaplaşdyrylýandygyny aýtdy. Hasabat döwründe jemi içerki önümiň ösüşi 6,3 göterim derejede durnukly saklanyp gelýär. Ýurdumyzda iri senagat desgalarynyň, täze şäherçeleriň, ýaşaýyş jaýlarynyň, mekdepleriň, çagalar baglarynyň hem-de beýleki desgalaryň gurluşygy dowam edýär. Döwlet Baştutanymyz kabul edilen döwlet maksatnamalaryna laýyklykda, ykdysadyýetimiziň pudaklaryny mundan beýläk-de ösdürmegi dowam etdirmäge aýratyn ünsi çekip, bu işleriň ýerine ýetirilişini hemişe berk gözegçilikde saklamagy tabşyrdy.

Mejlisde hormatly Prezidentimiz umumybilim berýän orta mekdepleriň birinji synp okuwçylaryna noutbuk kompýuterlerini sowgat bermek hakynda Karara gol çekdi.

2-nji maýda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň gurluşygynyň ikinji tapgyrynda alnyp barylýan işleriň maksatnamasy, gurulmagy meýilleşdirilýän we gurluşygy alnyp barylýan desgalaryň şekil taslamalary bilen tanyşdy. Şeýle hem bu ýerde degişli ýolbaşçylaryň gatnaşmagynda iş maslahaty geçirildi. Şunda metjidiň, Gahryman Arkadagymyzyň manyly ömür we zähmet ýoluna degişli gymmatlyklary ýerleşdirmek göz öňünde tutulýan muzeýiň gurluşygyndaky işleriň ýagdaýyna aýratyn üns berildi.

Iş maslahatynda Arkadag şäheriniň wekiliýetiniň Baku şäherinde geçiriljek Şäherleriň bütindünýä forumyna gatnaşmagy, şäheriň ikinji tapgyrynyň gurluşygynyň depginini çaltlandyrmak, ilaty ähli amatlyklary bolan ýaşaýyş jaýlaryna göçürip getirmek, “akylly” şäheriň bilim edaralaryny döwrebaplaşdyrmak, talyp haklaryny döretmek meseleleri, Türkmenistanyň Konstitusiýasynyň we Döwlet baýdagynyň gününe, Türkmen halysynyň baýramyna taýýarlyk görlüşi baradaky meseleler ara alnyp maslahatlaşyldy.

Geçen hepdede hormatly Prezidentimiziň tabşyrygy boýunça Mejlisde Müsür Arap Respublikasynyň Türkmenistanda täze bellenilen Adatdan daşary we Doly ygtyýarly ilçisi Hamdy Şaaban Abdelhalim Mohamedden ynanç haty kabul edildi. Diplomat Türkmenistanyň içeri we daşary syýasatynyň esasy ugurlary, Mejlisiň düzümi, onuň milli kanunçylyk binýadyny kämilleşdirmek boýunça amala aşyrýan köpugurly işleri bilen tanyşdyryldy.

Paýtagtymyzdaky Söwda-senagat edarasy Türkmen-hytaý işewürler forumynyň we sergisiniň geçirilen ýerine öwrüldi. Bu çäre dostlukly ýurduň senagat, eksport kuwwatyny görkezmek hem-de özara bähbitli gatnaşyklaryň geljegi uly ugurlaryny ösdürmek üçin netijeli meýdança boldy. Iri möçberli çäre dostlukly döwletiň işewür toparlarynyň 200-den gowrak wekilini türkmen paýtagtyna jemledi. Olaryň arasynda ýurdumyz bilen öňden bäri işleşip gelýän, alyjylaryň arasynda giňden belli bolan hyzmatdaşlar, işjeň gatnaşyklary ýola goýup, geljegi uly türkmen bazarynda orun almagy maksat edinýän işewürler hem bar.

70-den gowrak diwarlykda Hytaýyň gurluşyk, gaz, nebithimiýa toplumlaryny döwrebaplaşdyrmak ulgamyndaky köptaraply innowasion mümkinçilikleri, çig mal gorlaryna baha bermegiň tehnologiýalaryny işläp düzmekdäki, buraw işleri üçin döwrebap enjamlar, tehnikalar bilen üpjün etmekdäki gazananlary görkezildi. Türkmenistanyň “Beýik Ýüpek ýoluny gaýtadan dikeltmek” strategiýasynyň Hytaýyň “Bir guşak, bir ýol” başlangyjy bilen sazlaşykly utgaşmagy sebitiň ulag akymlarynyň artmagyna ýardam etmäge gönükdirilen ägirt uly taslamalarda öz beýanyny tapýar. Bu ugurda Hytaýyň korporasiýalary ýurdumyzyň awtomobil we demir ýollaryny döwrebaplaşdyrmakda, ýolagçylara ýokary hilli hyzmatlary hödürlemekde netijeli ulanylýan tehnikalary, döwrebap ýolagçy ulaglaryny hödürlediler. Telearagatnaşyk enjamlaryny, emeli aň tehnologiýalaryny, robotlary öndürýän, «akylly» şäherleri ösdürmäge, logistika taslamalaryna döwrebap tehnologiýalary ornaşdyrmaga bagyşlanan diwarlyklaryň töweregi hem köp adamly boldy.

Kompaniýalaryň birnäçesi dokma senagatynda, gurluşyk-gurnama işinde, ýyladyşhana, suw hojalygy pudagynda hödürleýän hyzmatlary bilen tanyşdyrdy. Sergä gatnaşyjylaryň hatarynda “akylly” tehnologiýalar esasynda işleýän oba hojalyk tehnikalaryny, optiki-süýümli aragatnaşyk kabellerini, dürli ekinleriň bol hasylly we daşky gurşawa çalt uýgunlaşýan görnüşleriniň tohumlaryny, weterinar derman serişdelerini öndürýän kompaniýalar hem bar. Serginiň çäklerinde oňa gatnaşan kompaniýalaryň öňdebaryjy tejribeleriniň we önümleriniň, hususan-da, ýöriteleşdirilen tehnikalary, awtomobilleri öndürmek ulgamyndaky gazananlarynyň tanyşdyrylyş dabaralary geçirildi.

Forumyň çäklerinde ýurdumyzyň degişli ministrlikleriniň, pudaklaýyn dolandyryş edaralarynyň ýolbaşçylarynyň iri hytaý kompaniýalarynyň wekilleri bilen geçiren köp sanly ikitaraplaýyn duşuşyklarynyň dowamynda taraplar gyzyklanma bildirilýän ugurlarda hyzmatdaşlygy hemmetaraplaýyn esasda ösdürmäge ygrarlydyklaryny tassykladylar. Türkmen-hytaý işewürler forumynyň çäklerinde ykdysadyýetiň dürli pudaklarynda, şol sanda maýa goýumlar, öňdebaryjy tehnologiýalar ulgamynda gatnaşyklary täze derejä çykarmagyň mümkinçilikleri barada pikir alşyldy, haryt dolanyşygyny giňeltmegiň, bilelikdäki işiň anyk ugurlary kesgitlenildi.

Geçen hepdäniň dynç günlerinde Aşgabat şäheri ýurdumyzyň Türki medeniýetiň halkara guramasy (TÜRKSOÝ) bilen medeni-ynsanperwer hyzmatdaşlygynyň çäklerinde guralan birnäçe çäreleriň geçirilen ýerine öwrüldi. Türkmenistanyň Döwlet medeniýet merkeziniň Mukamlar köşgünde türkmen professional saz sungatynyň düýbüni tutujy, meşhur kompozitor Weli Muhadowyň doglan gününiň 110 ýyllygy mynasybetli dabaraly konsert geçirildi. Şeýle hem bu ýerde Türki medeniýetiň halkara guramasynyň XXVII opera günleri mynasybetli dabaraly konsert geçirildi.

Şeýlelikde, geçen hepdäniň wakalary döwlet Baştutanymyzyň özara bähbitli halkara hyzmatdaşlygy giňeltmäge, ýurdumyzyň ykdysady kuwwatyny we halkymyzyň abadançylygyny artdyrmaga, milletimiziň medeni-ruhy mirasyny baýlaşdyrmaga gönükdirilen köptaraply işiniň netijeli häsiýete eýedigini nobatdaky gezek görkezdi.