Hormatly maslahata gatnaşyjylar!

Sizi Halkara parahatçylyk we ynanyşmak ýylynda Birleşen Milletler Guramasynyň döredilmeginiň şanly 80 ýyllygy mynasybetli geçirilýän maslahatyň öz işine başlamagy bilen tüýs ýürekden gutlaýaryn. Garaşsyz, Bitarap Türkmenistanyň halkara gatnaşyklaryň doly ygtyýarly subýekti hökmünde Birleşen Milletler Guramasy bilen ýokary netijeli strategik hyzmatdaşlygynyň barha giň gerime eýe bolýandygyny göz öňünde tutup, ak mermerli paýtagtymyz Aşgabatda geçirilýän bu maslahatyň örän uly daşary syýasy ähmiýetiniň bardygyny bellemek isleýärin.

Garaşsyz Watanymyzyň hemişelik Bitaraplyk hukuk ýagdaýynyň BMG-niň Baş Assambleýasynyň Kararnamalaryna laýyklykda üç gezek ykrar edilmegi demokratik, hukuk, dünýewi döwletimiziň, dörediji, gurujy we parahatçylyk söýüji halkymyzyň halkara at-abraýyny has belent derejä göterýär. Geçen taryhy döwürde toplanan daşary syýasy we diplomatik tejribe Bitaraplyk syýasatynyň milli bähbitlerimize, Birleşen Milletler Guramasynyň maksatlaryna doly laýyk gelýändigini aýdyň görkezdi. Şunuň bilen baglylykda, maslahatyň gün tertibinde parahatçylygyň, howpsuzlygyň hem-de durnukly ösüşiň möhüm meseleleri bilen birlikde, Türkmenistanyň bilelikdäki ählumumy tagallalara goşýan saldamly goşandy, öňe sürýän halkara başlangyçlarynyň durmuşa geçirilişi baradaky meseleleriň hem üns merkezinde boljakdygyna ynanýaryn.

Türkmenistanyň Bitarap döwlet hökmünde taryhda ilkinji gezek Birleşen Milletler Guramasynyň ýörite Kararnamasynyň biragyzdan kabul edilmegi bilen ykrar edilmeginiň 30 ýyllyk şanly baýramyna taýýarlyk görülýän döwürde geçirilýän bu maslahatda möhüm sebit we has giň halkara hyzmatdaşlyk meseleleri barada hem özara pikir alşylar.

Hormatly adamlar!

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň öňdengörüjilikli başlangyçlary bilen paýtagtymyz Aşgabat şäherinde açylan Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkeziniň üstünlikli işlemegi hem halkara bileleşigiň Türkmenistana bildiren uly ynamynyň ähmiýetini görkezýän hakykatdyr.

Gahryman Arkadagymyzyň «Dialog — parahatçylygyň kepili» atly filosofiýasynyň dabaralanmagy adamzadyň şu günki we geljekki nesilleriniň abadançylygynyň hem-de howpsuzlygynyň oňyn ugurlarynyň işlenilip düzülmeginde biziň döwletimiziň mynasyp ornuny has-da berkidýär. Bu ugurda «Türkmenistan — BMG» strategik maslahat beriş geňeşiniň döredilmegi ýurdumyzyň saýlap alan Bitaraplyk syýasatynyň many-mazmunyny açyp görkezýän mysaldyr.

Biz Berkarar döwletiň täze eýýamynyň Galkynyşy döwründe hoşniýetli goňşuçylyga, birek-birege hormat goýmaga, deňhukuklylyga, dünýäniň ähli döwletleri bilen özara bähbitli hyzmatdaşlyga esaslanýan Bitaraplyk syýasatymyzy yzygiderli dowam etdirýäris. Ýurdumyzyň başlangyjy esasynda BMG-niň Baş Assambleýasy tarapyndan parahatçylyk, howpsuzlyk we durnukly ösüş boýunça möhüm Kararnamalaryň uly toplumynyň kabul edilmegi dünýäde hyzmatdaşlygy ösdürmäge ýardam berýär, Bitarap Watanymyzyň at-abraýyny has-da artdyrýar.

Eziz watandaşlar!

Bitaraplyk biziň depginli ösüşlerimiziň kepilidir, merdana pederlerimiziň parahatçylyk we durnuklylyk, dostluk hem-de hoşniýetli goňşuçylyk baradaky asyrlarboýy eden arzuwlarynyň üstünlikli durmuşa geçirilmegi üçin uly mümkinçilikdir.

Garaşsyz ýurdumyzyň hemişelik Bitaraplyk hukuk ýagdaýy Birleşen Milletler Guramasy, Ýewropa Bileleşigi, Garaşsyz Döwletleriň Arkalaşygy, Şanhaý Hyzmatdaşlyk Guramasy, Ýewropada Howpsuzlyk we Hyzmatdaşlyk Guramasy, Goşulyşmazlyk Hereketi, Yslam Hyzmatdaşlyk Guramasy ýaly abraýly halkara guramalar, Ýer ýüzüniň döwletleri bilen syýasy, ykdysady, medeni gatnaşyklary yzygiderli giňeltmegiň, aýratyn-da, parahatçylygyň we ylalaşygyň, ählumumy ösüşiň bähbidine tagallalary birleşdirmegiň pugta halkara hukuk esasydyr.

«Awaza» milli syýahatçylyk zolagynda Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň ýokary derejede geçirilmegi hem Türkmenistanyň alyp barýan parahatçylyk, hoşniýetlilik we Bitaraplyk syýasatynyň ajaýyp miwesidir. Bu taryhy maslahatda oňa gatnaşyjy döwletleriň geljek on ýyl üçin ösüşiniň strategik ugruny kesgitleýän 2024 — 2034-nji ýyllar üçin Hereketleriň Awaza maksatnamasynyň yglan edilmegi hem-de Awaza syýasy Jarnamasynyň kabul edilmegi Türkmenistanyň başlangyçlarynyň dünýä jemgyýetçiligi tarapyndan giňden goldanylýandygynyň aýdyň mysalydyr.

Eziz watandaşlar!

Hormatly adamlar!

Sizi Halkara parahatçylyk we ynanyşmak ýylynda Birleşen Milletler Guramasynyň 80 ýyllygy mynasybetli geçirilýän maslahatyň öz işine başlamagy bilen ýene-de bir gezek tüýs ýürekden gutlaýaryn. Size berk jan saglyk, egsilmez bagt, asuda we abadan durmuş, eziz Watanymyzyň mundan beýläk-de gülläp ösmegi ugrunda alyp barýan işleriňizde uly üstünlikleri arzuw edýärin.

Goý, berkarar Watanymyzyň bitaraplyk, parahatçylyk söýüjilik, hoşniýetli goňşuçylyk, dost-doganlyk kadalaryny öňe sürýän döwlet hökmünde dünýä giňişligindäki at-abraýy has-da belende galsyn!

Türkmenistanyň Prezidenti
Serdar BERDIMUHAMEDOW.