Geçen hepdäniň wakalary hormatly Prezidentimiz Serdar Berdimuhamedowyň ýurdumyzyň ykdysady kuwwatynyň pugtalandyrylmagyna, täze taryhy eýýamda halkymyzyň bagtyýar durmuşynyň üpjün edilmegine gönükdirilen içeri we daşary syýasatynyň üstünlikli durmuşa geçirilýändiginiň nobatdaky aýdyň güwäsi boldy.

15-nji sentýabrda hormatly Prezidentimiz Serdar Berdimuhamedowyň tabşyrygy boýunça Mejlisde Bahreýn Patyşalygynyň Türkmenistanda täze bellenen Adatdan daşary we Doly ygtyýarly ilçisi Bassam Ahmed Ali Marzukdan ynanç haty kabul edildi. Duşuşygyň dowamynda diplomat Mejlisiň düzümi, onuň ýurdumyzyň kanunçylyk binýadyny döwrebaplaşdyrmagyň çäklerinde alyp barýan köpugurly işleri we Türkmenistanyň parahatçylyk söýüjilikli daşary syýasatynyň ileri tutulýan ugurlary bilen tanyşdyryldy. Şunda ýurdumyzyň dünýäde parahatçylygy, durnuklylygy, abadançylygy berkitmek babatda öňe sürýän döredijilikli başlangyçlarynyň möhüm ähmiýetine aýratyn üns çekildi.

17-nji sentýabrda täze Bagtly zamana obasynyň açylyş dabarasy boldy. Oba 400 sany döwrebap ýaşaýyş jaýyny, 640 orunlyk orta mekdebi, 320 orunlyk çagalar bagyny, söwda merkezini, geňeşligiň edara binasyny özünde jemleýär. Ahal welaýatynyň Kaka etrabynyň Gowşut geňeşliginde geçirilen dabara «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasynda» göz öňünde tutulan wezipeleriň üstünlikli durmuşa geçirilýändigini aýdyň görkezdi.

18-nji sentýabrda paýtagtymyzda milli ykdysadyýetimiziň, ýurdumyzyň syýasy-jemgyýetçilik, medeni-ynsanperwer durmuşyndaky giň möçberli özgertmeleriň, baý medeni mirasymyzyň guwandyryjy üstünliklerini şöhlelendirýän Türkmenistanyň ykdysady üstünlikleriniň sergisiniň açylyş dabarasy boldy. Söwda-senagat edarasynyň binasynda ýaýbaňlandyrylan köpugurly gözden geçiriliş milli ykdysadyýetimiziň ähli pudaklaryny döwrebaplaşdyrmak we diwersifikasiýalaşdyrmak boýunça alnyp barylýan işleri, döwlet maksatnamalarynyň, innowasion taslamalaryň çäklerinde üstünlikli amala aşyrylýan çäreleri giňden açyp görkezdi.

«Awaza» milli syýahatçylyk zolagynda Türkmenistanyň maýa goýum forumy geçirildi. Ykdysady gatnaşyklary pugtalandyrmaga, göni maýa goýumlary çekmäge we hyzmatdaşlygy ösdürmäge gönükdirilen, ýurdumyzyň hem-de dünýäniň işewür jemgyýetçiligi üçin möhüm wakalaryň biri bolan bu çäre döwlet düzümleriniň, halkara maliýe institutlarynyň we guramalarynyň, öňdebaryjy korporasiýalaryň ýokary wezipeli wekillerini, bilermenleri bir ýere jemledi. Forumda Türkmenistanyň maýa goýum özüne çekijiligi, ýurdumyzyň ýangyç-energetika toplumynyň ileri tutulýan pudaklarynyň ösüşi, gurluşyk we senagat pudagynda özara bähbitli hyzmatdaşlygyň mümkinçilikleri, oba hojalygynda howanyň üýtgemegine uýgunlaşmak, oba senagatyna, ulag-logistika ulgamyna maýa goýumlary çekmek bilen baglanyşykly meseleler ara alnyp maslahatlaşyldy. Forumyň çäklerinde ykdysadyýetiň dürli pudaklaryndaky maýa goýum taslamalary bilen tanyşdyryldy we ýurdumyzyň döwlet düzümleri bilen daşary ýurtly hyzmatdaşlaryň arasynda birnäçe ikitaraplaýyn resminamalara gol çekildi.

Geçen hepdäniň wakalaryna syny dowam etmek bilen, mukaddes Garaşsyzlygymyzyň 34 ýyllygynyň öňüsyrasynda — 19-njy sentýabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde Türkmenistanyň Halk Maslahatynyň nobatdaky mejlisiniň geçirilendigini bellemek gerek. Onda halkymyzyň bagtyýar, abadan durmuşyny üpjün etmäge gönükdirilen döwlet we syýasy-jemgyýetçilik durmuşynyň möhüm meseleleri, uzak möhletleýin geljek üçin ýurdumyzy ösdürmegiň wezipeleri ara alnyp maslahatlaşyldy.

Gahryman Arkadagymyz mejlisde çykyş edip, Arkadagly Gahryman Serdarymyzyň sebitde we halkara giňişlikde dost-doganlyk gatnaşyklaryny ösdürmek, parahatçylygy, ynanyşmagy pugtalandyrmak, durnukly ösüşi üpjün etmek babatda edýän tagallalarynyň uly üstünliklere beslenýändigini, Garaşsyz, hemişelik Bitarap döwletimiz tarapyndan umumadamzat bähbitli başlangyçlaryň we teklipleriň öňe sürülýändigini nygtady. “2025-nji ýyl biziň halkymyz hem-de dünýä halklary üçin örän wajyp taryhy seneleriň, şanly wakalaryň ýylydyr. Bu ýylyň Birleşen Milletler Guramasynyň Baş Assambleýasynyň Kararnamasy esasynda «Halkara parahatçylyk we ynanyşmak ýyly» şygary astynda geçýändigini buýsanç bilen bellemek isleýärin. Bu şygar biziň halkymyzyň parahatçylyga we dostluga, mydama ynanyşyp ýaşaşmaga bolan islegi bilen kemala gelendir” diýip, türkmen halkynyň Milli Lideri aýtdy.

Halk Maslahatynyň Başlygy ýurdumyzyň ýeten sepgitleri barada aýtmak bilen, içeri we daşary syýasatyň ähli ugurlary boýunça uly üstünlikleriň gazanylýandygyny, döwletimiziň ykdysady kuwwatynyň artyp, halkara abraýynyň pugtalanýandygyny belledi. Jemi içerki önümiň ösüş depgininiň durnukly ýagdaýda saklanyp galmagy, ykdysadyýetimizi innowasion esasda ösdürmek, sanly ulgamy ornaşdyrmak, şäher we oba ilatyny häzirki zaman ýaşaýyş jaýlary bilen üpjün etmek, täze iş orunlaryny döretmek boýunça alnyp barylýan toplumlaýyn işler ýurdumyzyň ykdysady ösüşiniň aýdyň subutnamasy hökmünde görkezildi.

Telekeçiligi, kiçi we orta işewürligi goldamak, milli önüm öndürijileriň taslamalaryny maliýeleşdirmek üçin halkara maliýe guramalary bilen işler dowam etdirilýär. Ýurdumyzda iş bilen üpjünçiligi has doly derejede üpjün etmek, raýatlary işe ýerleşdirmek babatda netijeli döwlet syýasaty alnyp barylýar. Raýatlara durmuş goraglylygynyň ygtybarly kepillendirmeleri berilýär. Gahryman Arkadagymyz daýhanlaryň azyk önümleriniň bolçulygyny döretmäge mynasyp goşant goşýandyklaryny aýdyp, ekologiýa we azyk howpsuzlygyny üpjün etmäge, «ýaşyl» ykdysadyýeti döretmäge gönükdirilen çäreleriň yzygiderli durmuşa geçirilýändigini belledi. Sebitleri ösdürmek babatda netijeli syýasat alnyp barylýar, täze senagat, energetika, ulag-aragatnaşyk düzümleri döredildi. Täze-täze döwrebap şäherçeler we obalar, ylym-bilim, saglygy goraýyş, medeniýet edaralary, önümçilik kärhanalary ulanmaga berlip, bu işler üstünlikli dowam etdirilýär.

Türkmen halkynyň Milli Lideri döwletimiziň kuwwatly binýadyny görkezýän, sanly tehnologiýalar ornaşdyrylan Arkadag şäherini ösdürmek boýunça netijeli we yzygiderli işleriň alnyp barylýandygyny, ýakyn geljekde “akylly” şäheriň senagat taýdan kuwwatly şähere öwrüljekdigini aýtdy. Şeýle hem hormatly Arkadagymyz ýaş nesli terbiýelemek bilen bagly meselelere ünsi çekdi. Şunuň bilen baglylykda, her bir ýaş raýatyň döwrebap bilim almagy bilen birlikde, olarda milli buýsanç duýgusynyň kemala gelmegini gazanmagyň möhümdigi bellenildi. Munuň özi ýaşlaryň bilimleriniň we garaýyşlarynyň derejesini has-da ýokarlandyrmaga ýardam eder.

Milli Liderimiz medeniýet ulgamyna, onuň halkara syýasatda eýeleýän ornuna degip geçmek bilen, medeniýetleriň özara gatnaşygynyň medeni diplomatiýa bolmazdan mümkin däldigini nygtady. Häzirki zaman dünýäsinde medeni diplomatiýa döwlet syýasatynyň aýrylmaz bölegi bolup durýar. Gahryman Arkadagymyz milli mirasyň, medeniýetiň we sungatyň, ylym-bilimiň uly gymmatlyklardygyny, olarda parahatçylyk dörediji güýjüň bardygyny belledi we şan-şöhrata eýe bolan meşhur taryhy şahsyýetlerimiziň atlaryny ebedileşdirmegi hem-de dünýä jemgyýetçiligine tanyşdyrmagy, taryhy şahsyýetlerimiziň ömri, ýaşan döwri, galdyran mirasy barada halkara ylmy-amaly maslahatlary guramagy, türkmen halkynyň taryhy bilen bagly çeper, dokumental filmleri döretmegi, halkymyzyň taryhyna, baý edebi mirasyna bagyşlanan neşirleri taýýarlamagy teklip etdi.

Türkmenistanyň Halk Maslahatynyň Başlygy bilim ulgamyna ünsi çekip, Garaşsyz ýurdumyzyň gazanýan zähmet üstünliklerinde, halkara bilim, sport bäsleşiklerinde eýeleýän belent sepgitlerinde ýaşlarymyzyň hyzmatynyň örän uludygyny aýratyn nygtady. “Halkyň saglygy diňe bir ýurduň baş baýlygy bolman, eýsem, türkmenistanlylaryň häzirki we geljek nesilleriniň bagtyýar geljeginiň berk binýadydyr” diýip, Milli Liderimiz sözüni dowam etdi we Aşgabat, Arkadag şäherlerinde, welaýat merkezlerinde Bütindünýä Saglygy Goraýyş Guramasynyň halkara talaplaryna laýyk gelýän ýöriteleşdirilen keselleri anyklaýyş-bejeriş merkezlerini, hassahanalary, şypahanalary, derman serişdelerini öndürýän kärhanalary gurmak boýunça ägirt uly işleriň amala aşyrylandygyny belledi. Mundan başga-da, Birleşen Milletler Guramasynyň ýöriteleşdirilen düzümleri, dünýäniň öňdebaryjy lukmançylyk we ylmy-barlag merkezleri bilen bilelikdäki taslamalar durmuşa geçirildi.

Nygtalyşy ýaly, ýurdumyzda ene-atasyndan aýra düşen we howandarlyga mätäç çagalary goldamaga uly üns berilýär. Bu ugurda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan alnyp barylýan işler örän buýsandyrýar. Bu çagalara durmuş, lukmançylyk, bilim hyzmatlarynyň berilmegi üçin zerur bolan ähli şertler döredilendir. Gaznanyň serişdeleriniň hasabyna ýörite gözegçilige we idege mätäç çagalara dürli operasiýalar, bejergiler amala aşyrylýar. Gazna abraýly halkara guramalar, şol sanda Birleşen Milletler Guramasynyň Çagalar gaznasy, Ilat gaznasy bilen çagalaryň saglygynyň goragyny, abadançylygyny hemmetaraplaýyn üpjün etmek, olaryň mümkinçiliklerini giňeltmek boýunça işjeň hyzmatdaşlyk edýär.

Hormatly Prezidentimiz Serdar Berdimuhamedow umumymilli forumda çykyş edip, şu ýylda ýerine ýetirilen, ýurdumyzda Garaşsyz, hemişelik Bitarap Watanymyzy durmuş-ykdysady taýdan ösdürmäge, halkymyzyň hal-ýagdaýyny barha ýokarlandyrmaga gönükdirilen işleriň jemlerini jemledi hem-de eziz Diýarymyzy mundan beýläk-de gülledip ösdürmegiň möhüm wezipelerini kesgitledi. Döwlet Baştutanymyz milli ykdysadyýetimiziň yzygiderli ösdürilýändigini, şu ýylyň başyndan bäri jemi içerki önümiň ösüşiniň 6,3 göterim derejede durnukly saklanmagynyň muňa aýdyň şaýatlyk edýändigini belledi.

Döwlet maýa goýum syýasatynyň netijeliligini has-da ýokarlandyrmak üçin zerur işler alnyp barylýar. Üstünlikli amala aşyrylýan sebit we milli derejedäki maýa goýum taslamalary oňyn netijesini berýär. Munuň özi Diýarymyzyň sebitleriniň ykdysady kuwwatynyň yzygiderli berkidilmegine ýardam berýär. Bu ugurda öňde goýlan wezipeleri mundan beýläk-de üstünlikli amala aşyrmak maksady bilen, «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasy» kabul edildi. Şunuň bilen baglylykda, golaýda geçirilen Türkmenistanyň maýa goýum forumynyň döwletimiziň dünýä jemgyýetçiligi bilen ykdysady gatnaşyklaryny pugtalandyrmaga, täze işewürlik hyzmatdaşlygyny ýola goýmaga we ýurdumyzyň maýa goýum mümkinçilikleri bilen tanyşmaga gowy şert döredendigi barada aýdyldy.

«Türkmenistany 2025-nji ýylda durmuş-ykdysady taýdan ösdürmegiň we maýa goýum Maksatnamasy» esasynda ýurdumyzy ösdürmek üçin şu ýylyň ahyryna çenli 40 milliard 72 million manat möçberinde düýpli maýa goýumlar özleşdiriler. Bu bolsa täze önümçilik we medeni-durmuş maksatly desgalary gurmaga hem-de döwrebaplaşdyrmaga şert döreder. Bellenilişi ýaly, ýurdumyzyň ähli sebitlerinde täze iş orunlaryny döretmek, ilatyň durmuş taýdan goraglylygyny üpjün etmek boýunça toplumlaýyn işler alnyp barylýar. Şu ýylyň ahyryna çenli täze döredilen iş orunlarynyň sany 3 müňden gowrak bolar. “Ýakynda «Türkmenistanyň zähmet bazaryny 2030-njy ýyla çenli ösdürmegiň Konsepsiýasy» kabul edildi. Bu Konsepsiýa esasynda täze, döwrebap iş orunlaryny dörederis, ilatymyzyň iş üpjünçiligini has-da kämilleşdireris” diýip, döwlet Baştutanymyz nygtady. Şunuň bilen baglylykda, «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» göz öňünde tutulan wezipeleri geljek ýylda-da üstünlikli ýerine ýetirmek üçin «Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasyny» işläp taýýarlamak hem-de ony Halk Maslahatyna hödürlemek tabşyryldy.

Hormatly Prezidentimiz şu ýyl döwletimiziň baş maliýe meýilnamasyndan bilimi, saglygy goraýşy, medeniýeti ösdürmäge, önümçilik we durmuş-medeni maksatly desgalaryň gurluşygyna köp möçberde serişdeleriň gönükdirilendigini belledi. Bu serişdelerden önümçilik maksatly desgalaryň gurluşygyna maýa goýumlaryň umumy möçberiniň 65,6 göterimi, medeni-durmuş maksatly desgalaryň gurluşygy üçin hem 34,4 göterimi goýberildi. Muňa garamazdan, ykdysadyýeti özgertmek, onuň innowasion ösüşini gazanmak, hususy pudagyň paýyny giňeltmek arkaly Döwlet býujetiniň girdeji bölegi artdyryldy. Bank hyzmatlarynyň hilini ýokarlandyrmak, milli manadyň hümmetini saklamak boýunça geçirilen özgertmeler durnukly pul dolanyşygyny, ykdysady ösüşi üpjün etdi. Geljekde-de Türkmenistanyň abraýly halkara guramalaryň ykdysady görkezijiler boýunça dünýäniň ösýän döwletleriniň sanawynda mynasyp orun almagy üçin ähli tagallalar ediler. Bu ýurdumyzyň durmuş-ykdysady strategiýasynyň baş maksady bolup durýar.

Döwlet Baştutanymyz Diýarymyzy mundan beýläk-de toplumlaýyn ösdürmäge gönükdirilen möhüm ähmiýetli Permanlara we Kararlara gol çekdi. Şolaryň hatarynda «Bitarap Türkmenistanyň parahatçylyk we ynanyşmak syýasatynyň hukuk esaslary hakynda» Türkmenistanyň Konstitusion kanuny, hormatly ýaşulularymyzy we mähriban enelerimizi sylaglamak hakynda, zähmetde gazanan üstünlikleri bilen tapawutlanan ýurdumyzyň raýatlaryny Garaşsyzlyk baýramy mynasybetli döwlet sylaglary bilen sylaglamak hakynda Permanlar, Ahal, Daşoguz, Lebap we Mary welaýatlarynyň käbir etraplarynyň häkimliklerini döretmek, Balkan welaýatynyň Türkmenbaşy etrabynda karbamid öndürýän toplumy gurmak hakynda Kararlar bar.

Arakesmäniň dowamynda «Halk hakydasy» ýadygärlikler toplumynda toý sadakasy berildi.

Soňra Halk Maslahatynyň mejlisinde hormatly Prezidentimiz Türkmenistanyň «Hormatly il ýaşulusy» diýen ada we «Zenan kalby» ordenine mynasyp bolan ýaşuly nesillere sylaglary dabaraly ýagdaýda gowşurdy.

20-nji sentýabrda paýtagtymyzda dürli pudaklarda zähmet çekýän, Garaşsyz Türkmenistanyň durmuş-ykdysady taýdan ösüşine, onuň halkara abraýyny artdyrmaga uly şahsy goşandyny goşan işgärlere, önümçiligiň öňdebaryjylaryna, ministrlikleriň we pudaklaýyn dolandyryş edaralarynyň, olaryň düzümleýin guramalarynyň hünärmenlerine, döredijilik işgärlerine döwlet sylaglaryny gowşurmak we hormatly atlary dakmak dabarasy boldy. Şol gün Türkmenistanyň hormatly atlaryna mynasyp bolan döredijilik işgärlerini hem-de edebiýat, medeniýet we sungat işgärleriniň, höwesjeň aýdymçy ýaşlaryň, zehinli çagalaryň arasynda yglan edilen Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşigiň ýeňijilerini sylaglamak dabarasy hem geçirildi.

21-nji sentýabrda hormatly Prezidentimiz Serdar Berdimuhamedow Birleşen Milletler Guramasynyň Baş Assambleýasynyň 80-nji sessiýasyna gatnaşmak üçin iş sapary bilen Amerikanyň Birleşen Ştatlaryna ugrady.

Şeýlelikde, geçen hepdäniň wakalary ýurdumyzyň durmuşynyň ähli ulgamlarynda ýetilen belent sepgitleriň, halkymyzyň yhlasly zähmeti netijesinde gazanylan ajaýyp üstünlikleriň aýdyň beýany boldy. Hormatly Prezidentimiziň baştutanlygynda döwletimiziň abadançylygynyň, halkymyzyň bagtyýar durmuşynyň bähbidine amala aşyrylýan düýpli özgertmeler rowaçlyklara beslenýär.