Garaşsyz ýurdumyz Berkarar döwletiň täze eýýamynyň Galkynyşy döwründe ykdysadyýetiň ähli ugurlarynda guwandyryjy netijelere eýe bolýar. Bitarap döwletimiziň her günüdir aý-ýyly zähmet ýeňişlerine beslenýär. Eziz Watanymyzy gülledip ösdürmek boýunça kabul edilen maksatnamalar üstünlikli durmuşa geçirilýär. Zähmetsöýer zenanlarymyz bu beýik işlere işjeň gatnaşýarlar. Olar ykdysadyýetiň dürli pudaklarynda tutanýerli zähmet çekip, Bitarap döwletimiziň Garaşsyzlygynyň 34 ýyllyk baýramyny uly sowgatly garşylaýarlar, ýurdumyzda agzybirligi we jebisligi berkitmekde, däp-dessurlarymyzy, maşgala ojagyny gorap saklamakda uly hyzmatlary bitirýärler.

Mähriban enelerimiz ýurdumyzyň jemgyýetçilik durmuşyna işjeň gatnaşyp, ogul-gyzlaryna, agtyk-çowluklaryna mynasyp edep-terbiýe bermekde, sowatly, giň gözýetimli, watançy, zähmetsöýer nesilleri terbiýeläp ýetişdirmekde bahasyna ýetip bolmajak işleri alyp barýarlar. Garaşsyz, Bitarap döwletimiziň içeri hem-de daşary syýasatyny düşündirmekde we durmuşa geçirmekde hem mähriban zenanlarymyzyň bitirýän hyzmatlary uly sylag-hormata mynasypdyr.

Türkmenistanyň Garaşsyzlygyny we özygtyýarlylygyny berkitmäge, türkmen jemgyýetiniň hem-de her bir maşgalanyň agzybirligini, bitewüligini we ahlak sütünlerini pugtalandyrmaga, türkmen halkynyň ruhy başlangyçlarynyň we däpleriniň yzygiderliligini üpjün etmäge goşan uly şahsy goşantlary, ösüp gelýän ýaş nesli okatmakda, ýaşlary türkmen halkynyň milli gymmatlyklaryna, taryhy mirasyna, gadymy däp-dessurlaryna we adatlaryna hormat goýmak duýgusynda, watançylyk, zähmetsöýerlik, edermenlik we mertlik häsiýetlerinde terbiýelemekde bitiren hyzmatlary üçin, aýratyn önjeýli jemgyýetçilik işlerini nazara alyp, şeýle hem hemişelik Bitarap Türkmenistanyň Garaşsyzlygynyň 34 ýyllyk baýramy mynasybetli, karar edýärin:

Ýurdumyzyň şu raýatlaryny Türkmenistanyň «Zenan kalby» ordeni bilen sylaglamaly:

Aşgabat şäheriniň Bagtyýarlyk etrabynyň ýaşaýjysy, pensioner Kümüş Nazarowany,

Türkmenistanyň Bilim ministrliginiň Arkadag şäherindäki iňlis diline ýöriteleşdirilen 2-nji orta mekdebiniň fizika mugallymy Gurbanbibi Akmyradowany,

Ahal welaýatynyň Bäherden etrabynyň Bäherden şäheriniň ýaşaýjysy, pensioner Annagül Annageldiýewna Gurbanowany,

Türkmenistanyň Bilim ministrliginiň Balkan welaýatynyň Türkmenbaşy şäher bilim bölüminiň Çagalar we ýetginjekler döredijilik öýüniň gurnak ýolbaşçysy Tazegül Şyhnepesowna Ýaýlymowany,

Türkmenistanyň Bilim ministrliginiň Daşoguz welaýatynyň Daşoguz şäherindäki 3-nji orta mekdebiniň matematika mugallymy Ogulgözel Mämedowna Hanowany,

Türkmenistanyň Bilim ministrliginiň Lebap welaýatynyň Türkmenabat şäherindäki 56-njy çagalar bakja-bagynyň terbiýeçi-usulyýetçisi Göwher Sultanowna Nursaidowany,

Mary welaýatynyň Türkmengala etrabynyň Hasyl geňeşliginiň Hasyl obasynyň ýaşaýjysy, pensioner Ogulgerek Şakulyýewany.

Türkmenistanyň Prezidenti
Serdar BERDIMUHAMEDOW.

Aşgabat şäheri, 2025-nji ýylyň 19-njy sentýabry.