Eziz Watanymyz hemişelik Bitaraplyk hukuk derejesine esaslanýan daşary syýasaty yzygiderli durmuşa geçirmek bilen, hormatly Prezidentimiz Serdar Berdimuhamedowyň baştutanlygynda ikitaraplaýyn we köptaraplaýyn görnüşde netijeli gatnaşyklary ösdürýär. Halkara gün tertibiniň möhüm meseleleri boýunça çözgütleri işläp taýýarlamakda oňyn başlangyçlar bilen çykyş edýän ýurdumyz parahatçylygy, howpsuzlygy, durnuklylygy üpjün etmäge, ählumumy abadançylygyň bähbidine hyzmatdaşlygy giňeltmäge uly goşant goşýar.

1-nji sentýabrda hormatly Prezidentimiz Serdar Berdimuhamedow Hytaý Halk Respublikasynyň Týanszin şäherinde geçirilen Şanhaý Hyzmatdaşlyk Guramasynyň sammitine gatnaşdy. HHR-iň Başlygy Si Szinpiniň başlyklyk etmeginde guralan ýokary derejeli duşuşyga ŞHG-ä agza ýurtlaryň, synçy we dialog boýunça hyzmatdaş ýurtlaryň döwlet hem-de hökümet Baştutanlary, iri halkara guramalaryň ýolbaşçylary gatnaşdylar.

Döwlet Baştutanymyz çykyşynda Bitaraplyk we özara bähbitlilik ýörelgelerinden ugur alýan Türkmenistanyň ŞHG bilen hyzmatdaşlygy çuňlaşdyrmaga ygrarlydygyny belledi. Hormatly Prezidentimiz Hytaý Halk Respublikasynyň Başlygynyň öňe süren Ählumumy dolandyryş başlangyjyny goldaýandygyny we bu pikiriň Türkmenistanyň konseptual garaýyşlaryna gabat gelýändigini nygtady. Ulag-logistika, kommunikasiýa, energetika, söwda ulgamlary, senagat kooperasiýasy ileri tutulýan ugurlaryň hatarynda görkezildi. Türkmen tarapy bitewi geoykdysady giňişligi kemala getirmek, gämigurluşyk pudagynda hyzmatdaşlygy ýola goýmak üçin Türkmenbaşy Halkara deňiz portunyň mümkinçiliklerinden we beýleki ugurlardan peýdalanmagy teklip etdi. Ýurdumyzyň ŞHG döwletlerine tebigy gazy ibermegiň möçberini artdyrmaga taýýardygy, elektrik energiýasyny ibermek, onuň ugurlaryny we möçberini giňeltmek ýaly meseleleri ara alyp maslahatlaşmak üçin açykdygy bellenildi. Şeýle hem medeniýet, ylym, bilim, durmuş ulgamlaryndaky beýleki gatnaşyklary pugtalandyrmagyň möhümdigi aýdyldy.

2-nji sentýabrda Hytaýyň Halk ýygnaklar öýünde döwlet Baştutanymyz Serdar Berdimuhamedow bilen Hytaý Halk Respublikasynyň Başlygy Si Szinpiniň arasynda resmi duşuşyk geçirildi. Nygtalyşy ýaly, Hytaý Türkmenistanyň esasy daşary ykdysady hyzmatdaşy bolup durýar. Gaz pudagy hyzmatdaşlygyň strategik ugry hökmünde görkezildi. Şunuň bilen baglylykda, duşuşygyň dowamynda bu ugurda özara gatnaşyklaryň täze tapgyryna hem-de Türkmenistan bilen Hytaýyň arasynda gaz hyzmatdaşlygynyň esasy ýörelgeleri hakynda Baş ylalaşygyň taslamasyna üns çekildi. Başlyk Si Szinpin HHR-iň ýurdumyz bilen hyzmatdaşlygy ikitaraplaýyn we köptaraplaýyn görnüşde, şol sanda “Merkezi Aziýa — Hytaý” formatynda mundan beýläk-de ösdürmäge taýýardygyny tassyklady. Ulag-logistika, medeni-ynsanperwer ulgamlar, parlament diplomatiýasy hyzmatdaşlygyň beýleki möhüm ugurlarynyň hatarynda kesgitlenildi.

Hormatly Prezidentimiziň Hytaýyň Kommunistik partiýasynyň Merkezi komitetiniň Syýasy býurosynyň hemişelik komitetiniň agzasy, Hytaý Halk Respublikasynyň Döwlet Geňeşiniň Premýeriniň birinji orunbasary Din Sýuesýan bilen duşuşygy boldy. Onda bilelikdäki tagallalary utgaşdyrmak, iki ýurduň söwda-ykdysady kuwwatyny durmuşa geçirmek işinde hökümetara komitete uly ähmiýet berilýändigi nygtaldy. Energetika ulgamy türkmen-hytaý hyzmatdaşlygynyň esasy ugurlarynyň biri hökmünde görkezildi. Şeýle-de ýurdumyz tarapyndan Merkezi Aziýanyň çäginden, Hazar deňziniň üstünden geçýän we günbatar tarapa uzaýan Türkmenistan — Hytaý ulag-logistika ulgamyny döretmek, demir ýol ulgamynda hyzmatdaşlygy mundan beýläk-de giňeltmek teklip edildi. Hytaýa dokma, himiýa senagaty, oba hojalyk we nebit önümleriniň eksportyny artdyrmaga taýýarlyk tassyklanyldy. Medeni-ynsanperwer ulgamda Türkmenistanyň ylmy-tehnologiýa, bilim edaralarynyň mümkinçiliklerini ulanmak arkaly ýokary tehnologiýalar, şol sanda emeli aň tehnologiýalary babatda hyzmatdaşlygy ösdürmek barada anyk teklipler beýan edildi.

Saparyň çäklerinde türkmen wekiliýetiniň agzalarynyň hytaý tarapynyň wekilleri bilen ikitaraplaýyn duşuşyklary geçirildi. Olarda intellektual eýeçilik, bilim, ylym-bilim taslamalary, muzeý işi, maglumatlary alyşmak, mediataslamalar, ulag we energetika ulgamlaryndaky hyzmatdaşlyk bilen baglanyşykly meseleler ara alnyp maslahatlaşyldy. Duşuşyklaryň netijeleri boýunça ikitaraplaýyn resminamalara gol çekildi.

3-nji sentýabrda hormatly Prezidentimiz Serdar Berdimuhamedow Hytaý Halk Respublikasyna saparynyň çäklerinde HHR-iň Başlygy Si Szinpiniň çakylygy boýunça Ikinji jahan urşunda gazanylan ýeňşiň 80 ýyllygynyň hormatyna Pekinde geçirilen dabaraly çärelere gatnaşdy.

Türkmenistan we Hytaý strategik hyzmatdaşlar bolmak bilen, parahatçylyk, durnukly ösüş ýörelgelerine ygrarlydyklaryny görkezýärler. Bu hyzmatdaşlyk özara hormat goýmaga, deňhukuklylyga esaslanyp, diňe bir iki ýurduň däl, eýsem, tutuş sebitiň gülläp ösmegine-de gönükdirilendir. Şeýle ygrarlylyk ýurtlarymyzyň daşary syýasatynda, bilelikdäki taslamalarda, abraýly halkara guramalaryň we sebitleýin düzümleriň çäklerindäki işjeň hyzmatdaşlygynda aýdyň beýanyny tapýar.

Ýaş nesli milli we umumadamzat gymmatlyklarynyň iň gowy nusgalary esasynda terbiýelemek Gahryman Arkadagymyz tarapyndan başy başlanyp, häzirki wagtda hormatly Prezidentimiziň baştutanlygynda üstünlikli durmuşa geçirilýän özgertmeler syýasatynyň ileri tutulýan ugurlarynyň biridir. Şunuň bilen baglylykda, jemgyýetimiziň we döwletimiziň mundan beýläk-de ösmegi üçin möhüm binýady emele getirýän milli bilim ulgamyny kämilleşdirmäge aýratyn ähmiýet berilýär. Garaşsyzlygymyzyň 34 ýyllygyna, hemişelik Bitaraplygymyzyň şanly 30 ýyllygyna beslenýän Halkara parahatçylyk we ynanyşmak ýylynda ýurdumyzda Bilimler we talyp ýaşlar gününiň giňden bellenilmegi aýratyn ýatda galyjy boldy.

Geçen hepdede türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow paýtagtymyzda Halkara senagatçylar we telekeçiler uniwersitetiniň açylyş dabarasyna gatnaşdy. Uniwersitetde bir wagtyň dowamynda 3 müňe golaý talybyň bilim almagy, professor-mugallymlaryň netijeli işlemegi üçin ähli şertler döredilendir.

«Nur bina gurluşyk» hususy kärhanasy tarapyndan bina edilen täze bilim ojagynyň binalar toplumy 9 gatly baş binany, 4 sany okuw binasyny, 2 sany her biri 300 orunlyk umumy ýaşaýyş jaýyny, mejlisler zalyny, kitaphanany, naharhanany, ýapyk we açyk sport desgalaryny özünde jemleýär. Bu ýerde okuwlar türkmen we iňlis dillerinde alnyp barlyp, bakalawr hem-de magistr taýýarlygynyň ugurlary boýunça guralar. Okuw maksatnamasy telekeçiligiň hukuk hem işewürlik esaslaryna, sanly tehnologiýalar ulgamynda bilim almaga gönükdirilendir. Bilim bermegiň hilini ýokarlandyrmak üçin daşary ýurtlardan mugallymlaryň, hünärmenleriň çagyrylmagy göz öňünde tutulýar.

Türkmen halkynyň Milli Lideri uniwersitetiň täze binalar toplumynyň innowasiýalara esaslanýan işewürligi ýokary bilimli kämil hünärmenler bilen üpjün etmegiň ýolunda möhüm ädimdigini belläp, bu döwrebap ýokary okuw mekdebinde bilim aljak ýaşlaryň ýakyn geljekde ýokary taýýarlykly hünärmenler bolup, Garaşsyz Watanymyzyň mundan beýläk-de gülläp ösmegine mynasyp goşant goşjakdyklaryna ynam bildirdi.

1-nji sentýabrda Mary şäherinde Türkmenistanyň Döwlet energetika institutynyň täze desgalarynyň, şol sanda 2 müň orunlyk goşmaça okuw binasynyň, 800 orunlyk umumy ýaşaýyş jaýynyň, sport desgasynyň hem-de aýlawly ýoluň ugrundaky “Täze kuwwat” binasynyň açylyş dabarasy boldy. Şeýle hem bu ýerde halkara guramalaryň täze desgalaryň ýokary halkara ölçeglere laýyk gelýändigini tassyklaýan güwänamalary dabaraly ýagdaýda gowşuryldy we Döwlet energetika instituty bilen Germaniýa Federatiw Respublikasynyň Klaustal tehnologiýa uniwersitetiniň hem-de bu ýurduň Martin Lýuter adyndaky Galle-Wittenberg uniwersitetiniň arasynda özara düşünişmek hakynda Ähtnamalara gol çekildi.

1-nji sentýabrda ýurdumyzyň ähli bilim edaralarynda 2025-2026-njy täze okuw ýylynyň başlanýandygyny alamatlandyrýan ilkinji jaň kakyldy. Asylly däbe görä, täze okuw ýylynyň ilkinji güni Garaşsyzlyk binasyna we Berdimuhamet Annaýew adyndaky Arkadag şäher mugallymçylyk orta hünär okuw mekdebindäki hem-de Gökdepe etrabynyň Yzgant şäherçesindäki 27-nji orta mekdepde ýerleşýän Berdimuhamet Annaýewiň ýadygärliklerine gül goýmak bilen başlandy. Bilimler we talyp ýaşlar gününde ähli orta hem ýokary okuw mekdeplerinde dabaraly nyzamlar geçirilip, olarda hormatly Prezidentimiz Serdar Berdimuhamedowyň Gutlagy okaldy. Döwlet Baştutanymyzyň Gutlagynda ýaş nesillere bilimler we ylymlar dünýäsinde üstünlikler arzuw edilýär. “Milli maksatnamalarymyzy, konsepsiýalarymyzy we strategiýalarymyzy üstünlikli durmuşa geçirip, häzirki zaman tehnologiýalary bilen üpjün edilen döwrebap bilim edaralarynyň sanyny artdyrýarys, milli we öňdebaryjy tejribeler esasynda bilim işiniň netijeliligini has-da ýokarlandyrýarys. Daşary syýasy strategiýamyzyň möhüm bölegi hökmünde abraýly halkara guramalar, daşary ýurt döwletleri bilen halkara hyzmatdaşlygy has-da işjeňleşdirip, bilim babatda gazananlarymyzy dünýä ýaýýarys” diýip, hormatly Prezidentimiz mekdep okuwçylaryna, talyp ýaşlara, mugallymlara we ähli bilim işgärlerine iberen Gutlagynda belledi.

Watanymyzyň özgertmeler ýoly bilen okgunly öňe barýan Berkarar döwletiň täze eýýamynyň Galkynyşy döwri bilimiň we okatmagyň usulyýetiniň ösüşiniň ýokary derejesi, ylmy-tehniki gazanylanlaryň ornaşdyrylmagy bilen şertlendirilendir. Şunuň bilen baglylykda, Bilimler we talyp ýaşlar gününe gabatlanyp, bilimler dünýäsine ilkinji gezek gadam basan körpelere “Bilimli” noutbuk kompýuterleriniň gowşurylandygyny bellemek gerek. Ýurdumyzyň bilim edaralarynda ilkinji okuw sapagy Halkara parahatçylyk we ynanyşmak ýylyna hem-de şu ýylda 30 ýyllygy bellenilýän hemişelik Bitaraplygymyza bagyşlandy.

Eziz Watanymyzyň obadyr şäherlerinde täze, döwrebap orta mekdepleriň, çagalar baglarynyň dabaraly açylmagy bilim ulgamynyň dünýä ölçeglerine laýyklykda ösdürilýändigine, bu ugurda uly üstünlikleriň gazanylýandygyna aýdyň şaýatlyk edýär. Paýtagtymyzda we Lebap welaýatynda täze binalaryň, hususan-da, jemi 2 müň 800 orunlyk 4 sany umumybilim berýän orta mekdebiň, 1 müň 120 orunlyk 4 sany çagalar bagynyň açylyp ulanmaga berilmegi munuň aýdyň mysalydyr. Şunuň bilen bir hatarda, Aşgabat şäheriniň “Parahat — 7” ýaşaýyş toplumynda, Bagtyýarlyk etrabynyň “Çoganly” ýaşaýyş toplumynda, Büzmeýin etrabynyň Senagat köçesiniň ugrunda, Bagtyýarlyk etrabynyň “Ýasmansalyk” ýaşaýyş toplumynda çagalar baglary açylyp ulanmaga berildi. Aşgabat şäheriniň “Parahat — 7” ýaşaýyş toplumynda umumybilim berýän orta mekdepleriň, Bagtyýarlyk etrabynyň “Çoganly” ýaşaýyş toplumynda umumybilim berýän orta mekdebiň açylyş dabaralary hem ýatdan çykmajak pursatlara beslendi. Täze umumybilim berýän döwrebap orta mekdep Lebap welaýatynyň Çärjew etrabynyň Hojaili geňeşliginiň Bekaryk obasynyň ýaşaýjylary üçin hem ajaýyp toý sowgady boldy.

3-nji sentýabrda Türkmenistanda güýzlük bugdaý ekişine girişildi. Hormatly Prezidentimiz Serdar Berdimuhamedowyň ak pata bermegi bilen, bu möhüm oba hojalyk möwsümi ýurdumyzyň ähli welaýatlarynda birbada badalga aldy. Döwlet Baştutanymyzyň 29-njy awgustda sanly ulgam arkaly geçirilen Ministrler Kabinetiniň mejlisinde belleýşi ýaly, oba hojalyk pudagynda geçirilýän düýpli özgertmeler ýokary hilli oba hojalyk önümleriniň möçberini artdyrmaga, azyk bolçulygyny üpjün etmäge gönükdirilendir. Arkadagly Gahryman Serdarymyzyň tabşyryklaryny durmuşa geçirmek maksady bilen, ekerançylarymyz geljek ýylyň bugdaý hasyly üçin niýetlenen ekin meýdanlaryny öz wagtynda sürüp we gurplandyryp, jogapkärli möwsüme aýratyn yhlas bilen girişdiler. Şunuň bilen bir hatarda, bugdaýyň ýokary hasyl berýän görnüşleriniň tohumlary, ekişde ulanyljak oba hojalyk tehnikalary öňünden taýýar edildi.

5-nji sentýabrda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi. Şolaryň hatarynda ýurdumyzyň kanunçylyk binýadyny kämilleşdirmek, umumymilli foruma — Türkmenistanyň Halk Maslahatynyň nobatdaky mejlisine taýýarlyk işleri, maliýe-ykdysady syýasat we zähmet gatnaşyklary, “Türkmennebit” döwlet konserniniň nebiti gaýtadan işleýän zawodlarynyň önümçiligini has-da döwrebaplaşdyrmak, möwsümleýin oba hojalyk işleriniň barşy, halkara söwda-ykdysady gatnaşyklary ösdürmek, milli ykdysadyýetimiziň ähli pudaklaryny sanlylaşdyrmak, döwrebap çözgütlere esaslanýan innowasion tehnologiýalary önümçilige ornaşdyrmak bilen baglanyşykly meseleler bar.

Döwlet Baştutanymyz pagta ýygymy möwsümini guramaçylykly geçirmek maksady bilen, ýurdumyzyň welaýatlarynda 10-njy sentýabrda bu möhüm çärä başlamaga ak pata berdi we hormatly ýaşululardan pagta ýygymyny “bismilla” bilen başlap bermeklerini haýyş etdi. Hormatly Prezidentimiziň garamagyna “Türkmenistanyň zähmet bazaryny 2030-njy ýyla çenli ösdürmegiň Konsepsiýasynyň” taslamasy; Seýdiniň nebiti gaýtadan işleýän zawodynyň degişli desgasyny döwrebaplaşdyrmak; Ahal welaýatynda täze gurlan çüýşe önümlerini öndürýän önümhananyň açylyp ulanmaga berilmegi; Türkiýe Respublikasynyň Stambul şäherinde geçiriljek «Halal Expo 2025» atly halkara sergä Türkmenistanyň milli pawilýony bilen gatnaşmagy baradaky teklipler, ýurdumyzyň ýokary tehnologiýaly, bäsdeşlige ukyply sanly ykdysadyýetini ösdürmek baradaky resminamanyň taslamasy hödürlenildi.

Mejlisiň dowamynda döwlet Baştutanymyzyň ýolbaşçylygyndaky Hökümet wekiliýetiniň Şanhaý Hyzmatdaşlyk Guramasynyň sammitine hem-de Ýeňşiň 80 ýyllygyna bagyşlanan dabaralara gatnaşmak maksady bilen, Hytaý Halk Respublikasynyň Týanszin we Pekin şäherlerine amala aşyran iş saparynyň netijeleri barada hasabat berildi. Bellenilişi ýaly, saparyň öňüsyrasynda we onuň barşynda ikitaraplaýyn resminamalaryň 5-sine gol çekildi. Şolaryň hatarynda Türkmenistanyň Hökümeti bilen Hytaý Halk Respublikasynyň Hökümetiniň arasynda tehniki-ykdysady hyzmatdaşlyk hakynda Ylalaşyk, şeýle hem intellektual eýeçilik, ýokary bilim, muzeý işi we köpçülikleýin habar beriş serişdeleri ýaly ulgamlarda hyzmatdaşlyk boýunça özara düşünişmek hakynda Ähtnamalar bar. Mundan başga-da, saparyň çäklerinde türkmen wekiliýetiniň agzalarynyň we HHR-iň wekilleriniň arasynda ikitaraplaýyn duşuşyklaryň 11-si geçirildi.

5-nji sentýabrda hormatly Prezidentimiz Serdar Berdimuhamedow Ýaponiýanyň Halkara hyzmatdaşlyk bankynyň başlygynyň orunbasary Kadzuhiko Amakawany kabul etdi. Döwlet Baştutanymyz tebigy serişdeleriň ägirt uly gorlaryna eýe bolan Türkmenistanyň bu ulgamy diwersifikasiýa ýoly bilen ösdürmegi maksat edinýändigini aýdyp, ýurdumyzyň ykdysady mümkinçilikleriniň netijeli ulanylmagynda ýapon kompaniýalarynyň uly goşandyny belledi. Şunuň bilen baglylykda, Ýaponiýanyň Halkara hyzmatdaşlyk banky bilen köp ýyllaryň dowamynda netijeli hyzmatdaşlygyň alnyp barylýandygyna we birnäçe iri taslamalaryň durmuşa geçirilendigine üns çekildi.

Kadzuhiko Amakawa Türkmenistanda ykdysady ösüş maksatnamalarynyň, senagat pudagyndaky özgertmeleriň amala aşyrylmagy netijesinde işewürlik üçin oňaýly şertleriň döredilýändigini aýdyp, wekilçilik edýän bankynyň ýurdumyz bilen hyzmatdaşlygy täze ugurlar boýunça işjeňleşdirmäge ygrarlydygyny tassyklady. Hormatly Prezidentimiz Türkmenistanyň tebigy gazy çykarmak we gaýtadan işlemek boýunça uly meýilnamalarynyň bardygyny, şu nukdaýnazardan, özara hyzmatdaşlygy ösdürmek üçin täze mümkinçilikleriň açylýandygyny belledi hem-de ýurdumyzyň hyzmatdaşlygy mundan beýläk-de täze ugurlar boýunça ösdürmek babatda ýapon tarapynyň anyk tekliplerine seretmäge taýýardygyny tassyklady.

Geçen hepdede döwlet Baştutanymyzyň gol çeken Buýrugyna laýyklykda, goňşy owgan halkyna, ilkinji nobatda, Owganystanyň ýertitremeden ejir çeken çagalaryna dokma, azyk önümleri, egin-eşikler hem-de durmuşda zerur bolan beýleki önümler ynsanperwerlik kömegi hökmünde ugradyldy. Owganystanda bolan ýertitreme zerarly ejir çekenlere Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan ynsanperwerlik kömeginiň iberilmegi ýurdumyzda haýyr-sahawat, ynsanperwerlik ýaly asylly ýörelgelere möhüm ähmiýet berilýändigini nobatdaky gezek äşgär edýär.

6-njy sentýabrda Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Onda harby we hukuk goraýjy edaralaryň şu ýylyň ýanwar — awgust aýlarynda ýerine ýetiren işleriniň netijelerine garaldy. Şeýle hem mejlisiň gün tertibine Garaşsyz Watanymyzda howpsuzlygy, parahatçylygy üpjün etmek, harby we hukuk goraýjy edaralaryň maddy-enjamlaýyn binýadyny pugtalandyrmak, olaryň işini mundan beýläk-de kämilleşdirmek bilen baglanyşykly meseleler girizildi. Eziz Watanymyzyň mukaddes Garaşsyzlygynyň 34 ýyllygy mynasybetli geçiriljek dabaraly harby ýörişe taýýarlyk görlüşi, paýtagtymyzda hem-de welaýatlarda sentýabr aýynyň başyndan bäri “Ýol hereketiniň howpsuzlygy — ömrümiziň rahatlygy” atly biraýlygyň çäklerinde geçirilýän dürli çäreler barada hasabatlar diňlenildi. Mejlisiň dowamynda ýurdumyzyň Ýaragly Güýçleriniň Belent Serkerdebaşysy «Türkmenistanyň kazyýetleriniň kazylaryny wezipä bellemek we wezipeden boşatmak hem-de olara hünär derejelerini bermek hakynda» Permana gol çekdi.

Asylly däbe görä, ýurdumyzyň Garaşsyzlygynyň 34 ýyllygy mynasybetli geçirilen “Garaşsyzlygyň merjen däneleri” çagalar aýdym-saz bäsleşiginiň jemleýji döwlet tapgyry uly ruhubelentlige beslendi. Ösüp gelýän ýaş nesilleriň döredijilik ukyplaryny ýüze çykarmak hem-de goldamak, olary watançylyk, halkymyzyň däp-dessurlaryna hormat goýmak ruhunda terbiýelemek bäsleşigiň baş maksadydyr.

7-nji sentýabrda paýtagtymyzdaky «Aşgabat» aýdym-saz merkezinde «Ýaňlan, Diýarym!» telebäsleşiginiň jemleýji tapgyry geçirildi. Oňa bäsleşigiň deslapky tapgyrlarynda ýeňiji bolan ýaş aýdymçylaryň 14-si gatnaşdy. Türkmenistanyň Medeniýet ministrliginiň, Telewideniýe, radiogepleşikler we kinematografiýa baradaky döwlet komitetiniň bilelikde guramagynda ýaş aýdymçylaryň arasynda yglan edilen bu bäsleşik Türkmenistanyň Prezidentiniň «Türkmeniň Altyn asyry» baýragyny almak ugrundaky bäsleşigiň çäklerinde her ýyl geçirilýär. Ýeňijilere ýörite diplomlar, Türkmenistanyň Prezidentiniň altyn zynjyry gowşuryldy. Jemleýji tapgyra gatnaşanlaryň ählisi bolsa döwlet Baştutanymyzyň adyndan ýadygärlik sowgatlara mynasyp boldular.

Şeýlelikde, geçen hepdäniň wakalary Berkarar döwletiň täze eýýamynyň Galkynyşy döwründe Watanymyzyň ägirt uly döredijilik we ykdysady kuwwatyny aýdyň görkezip, hormatly Prezidentimiz Serdar Berdimuhamedowyň baştutanlygynda ösüşleriň täze belentliklerine tarap ynamly öňe barýan ýurdumyzyň her bir gününiň üstünliklere beslenýändiginiň nobatdaky güwäsi boldy.