Şu gün hormatly Prezidentimiz Serdar Berdimuhamedowyň tabşyrygy boýunça Mejlisiň Başlygy D.Gulmanowa Sloweniýa Respublikasynyň Türkmenistanda täze bellenen Adatdan daşary we Doly ygtyýarly ilçisi Alenka Suhadolnikden ynanç hatyny kabul etdi.

Milli parlamentiň ýolbaşçysy döwlet Baştutanymyzyň adyndan diplomaty jogapkärli wezipä bellenilmegi bilen gutlady hem-de iki ýurduň arasyndaky hyzmatdaşlygy pugtalandyrmak boýunça alyp barjak işinde üstünlikleri arzuw etdi.

Ilçi hoşniýetli sözler üçin hoşallyk bildirip, öz gezeginde, Sloweniýa Respublikasynyň ýolbaşçylarynyň hormatly Prezidentimiz Serdar Berdimuhamedowa iberen mähirli salamyny, Türkmenistanyň halkyna bolsa abadançylyk, gülläp ösüş baradaky arzuwlaryny ýetirdi.

Duşuşygyň dowamynda diplomat Türkmenistanyň içeri we daşary syýasatynyň esasy ugurlary bilen tanyşdyryldy. Şunda dünýä ýurtlary, şol sanda Ýewropa döwletleri bilen özara bähbitli hyzmatdaşlygy pugtalandyrmagyň Türkmenistanyň alyp barýan parahatçylyk söýüjilikli daşary syýasatynyň ileri tutulýan ugurlarynyň biridigine üns çekildi. Şeýle hem söhbetdeşligiň dowamynda Türkmenistan bilen Sloweniýa Respublikasynyň arasynda dürli ugurlar boýunça ösdürilýän gatnaşyklaryň möhüm ähmiýeti bellenildi.

Duşuşygyň ahyrynda Sloweniýa Respublikasynyň Türkmenistandaky Adatdan daşary we Doly ygtyýarly ilçisi Alenka Suhadolnik mähirli kabul edilendigi hem-de netijeli duşuşyk üçin hoşallyk bildirip, iki ýurduň arasyndaky dostlukly gatnaşyklary mundan beýläk-de pugtalandyrmak ugrunda tagalla etjekdigine ynandyrdy.

* * *

Onuň Alyhezreti, 

Türkmenistanyň Prezidenti

jenap Serdar BERDIMUHAMEDOWA

Siziň Alyhezretiňiz!

Ýurtlarymyzyň arasyndaky dostlukly gatnaşyklary we özara bähbitli hyzmatdaşlygy ösdürmek hem-de pugtalandyrmak maksady bilen, hanym Alenka Suhadolnigi Sloweniýa Respublikasynyň Türkmenistandaky Adatdan daşary we Doly ygtyýarly ilçisi wezipesine belledim. Siziň Alyhezretiňizden hanym Alenka Suhadolnigi mähirli kabul etmegiňizi we onuň Sloweniýa Respublikasynyň adyndan ähli beýan etjeklerine doly ynanmagyňyzy Sizden haýyş edýärin.

Pursatdan peýdalanyp, Siziň Alyhezretiňize abadançylyk, Türkmenistana bolsa gülläp ösüş baradaky arzuwlarymy beýan edýärin.

Size belent hormat goýýandygym baradaky ynandyrmalarymy kabul ediň!

Nataşa PIRS-MUSAR,

Sloweniýa Respublikasynyň Prezidenti.