Şu gün hormatly Prezidentimiz Serdar Berdimuhamedow bilen Eýran Yslam Respublikasynyň Prezidenti Masud Pezeşkianyň arasynda telefon arkaly söhbetdeşlik geçirildi.

Döwlet Baştutanymyz hem-de dostlukly goňşy döwletiň Prezidenti mähirli salamlaşyp, birek-birege we iki ýurduň doganlyk halklaryna mukaddes Gurban baýramy mynasybetli gutlaglaryny beýan etdiler hem-de mübärek günlerde beriljek sadakalaryň, ýagşy doga-dilegleriň Beýik Biribaryň dergähinde kabul bolmagyny dileg etdiler.

Prezident Masud Pezeşkian Türkmenistan bilen dost-doganlyk gatnaşyklarynyň we köpugurly hyzmatdaşlygyň ösdürilmegine Eýranda möhüm ähmiýet berilýändigini belledi hem-de pursatdan peýdalanyp, türkmen halkynyň Milli Lideri Gahryman Arkadagymyza dogaýy salamyny we iň gowy arzuwlaryny beýan etdi.

Şeýle hem dostlukly ýurduň Baştutany Türkmenistanyň başlangyjy bilen BMG-niň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmeginiň möhüm ähmiýetini belläp, hormatly Prezidentimiz Serdar Berdimuhamedowyň parasatly baştutanlygynda ýurdumyzyň alyp barýan parahatçylyk döredijilikli daşary syýasatyna ýokary baha berdi.

Hormatly Prezidentimiz hoşniýetli sözler üçin minnetdarlyk bildirip, Prezident Masud Pezeşkiana türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň mähirli salamyny hem-de Gurban baýramy mynasybetli gutlaglaryny ýetirdi.

Bellenilişi ýaly, taryhy we medeni umumylyklary bolan iki ýurduň halklarynyň arasyndaky gatnaşyklar müňlerçe ýyllara uzap gidýär.

Söhbetdeşler häzirki döwürde Türkmenistan bilen Eýranyň arasyndaky syýasy-ykdysady we medeni gatnaşyklaryň yzygiderli ösdürilýändigini bellediler.

Telefon arkaly söhbetdeşligiň dowamynda hormatly Prezidentimiz we dostlukly ýurduň Prezidenti iki döwletiň arasyndaky dost-doganlyk gatnaşyklary berkitmek we özara bähbitli hyzmatdaşlygy giňeltmek boýunça işleri mundan beýläk-de dowam etmäge taýýardyklaryny tassykladylar.

Prezident Masud Pezeşkian döwlet Baştutanymyzy we Gahryman Arkadagymyzy, şeýle hem ähli türkmen halkyny mukaddes Gurban baýramy mynasybetli ýene bir gezek gutlap, bu mübärek günlerde beriljek sadakalaryň we ediljek doga-dilegleriň Allatagalanyň dergähinde kabul bolmagyny dileg etdi.

Söhbetdeşligiň ahyrynda hormatly Prezidentimiz Serdar Berdimuhamedow we Eýran Yslam Respublikasynyň Prezidenti Masud Pezeşkian birek-birege berk jan saglyk, bagtyýarlyk, jogapkärli döwlet işlerinde üstünlikleri, iki ýurduň doganlyk halklaryna bolsa parahatçylyk, abadançylyk, rowaçlyk arzuw etdiler.

Telefon arkaly söhbetdeşlik eýran tarapynyň başlangyjy bilen geçirildi.