Şu gün paýtagtymyzda 14 ýaşa çenli ýetginjek oglan-gyzlaryň arasynda geçirilýän tennis boýunça «Ashgabat Open 2024» atly halkara ýaryşyň açylyş dabarasy boldy. Ýaryşa Ýewropanyň we Aziýanyň 12 ýurdundan türgenler gatnaşýar. Bu waka Aşgabadyň halkara sport merkezi hökmünde ykrar edilýändiginiň, hormatly Prezidentimiz Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň baştutanlygynda durmuşa geçirilýän, döwlet syýasatynyň ileri tutulýan ugurlarynyň biri hökmünde çykyş edýän bedenterbiýäni, sporty ösdürmäge gönükdirilen strategiýanyň Halkara we Aziýa Tennis federasiýalary tarapyndan giň goldawa eýe bolýandygynyň nobatdaky aýdyň güwäsidir.

Berkarar döwletiň täze eýýamynyň Galkynyşy döwründe ýurdumyzda bedenterbiýe-sagaldyş we sport hereketi giň gerime eýe boldy. Dürli ýaşdaky adamlaryň müňlerçesini özünde jemleýän köpçülikleýin sport çärelerini geçirmek asylly däbe öwrüldi. Ýokary netijeli sporty ösdürmäge, halkara derejeli sport ussatlarynyň, türgenleriň, degişli hünärmenleriň taýýarlanylmagyna aýratyn üns berilýär. Türkmen türgenleri iri halkara ýaryşlara yzygiderli gatnaşyp, baýrakly orunlara, medallara, şol sanda altyn medallara mynasyp bolýarlar. Şu ýylyň başyndan bäri türgenlerimiz halkara ýaryşlaryň 161-sine gatnaşyp, 174 altyn, 150 kümüş, 214 bürünç, umumylykda bolsa 538 medala mynasyp boldular. Bularyň ählisi sport döwleti hökmünde ýurdumyzyň abraý-mertebesiniň barha artýandygyna şaýatlyk edýär.

Soňky ýyllarda halkara sport guramalary bilen hyzmatdaşlykda paýtagtymyzdaky dünýä ölçeglerine laýyk gelýän Olimpiýa şäherçesinde birnäçe halkara ýaryşlar, şol sanda 2017-nji ýylda Ýapyk binalarda we söweş sungaty boýunça V Aziýa oýunlary üstünlikli geçirildi. «Amul — Hazar 2018» halkara awtorallisi, Agyr atletika boýunça dünýä çempionaty ýurdumyzyň sport abraýynyň has-da artmagyna goşant goşdy. Şeýle hem Aşgabatda geçirilen iri sport ýaryşlarynyň hatarynda Kuraş boýunça 14-nji dünýä çempionatyny, GDA-nyň we beýleki ýurtlaryň toparlarynyň gatnaşmagynda guralan hokkeý boýunça halkara ýaryşy görkezmek bolar.

Aziýanyň Tennis federasiýasynyň (ATF) Türkmenistanyň Tennis federasiýasy tarapyndan Aşgabatda 12 ýaşa çenli çagalaryň arasynda guralan Merkezi Aziýanyň toparlaýyn çempionatynyň guramaçylyk derejesine ýokary baha bermegi, ATF-nyň ýolbaşçylarynyň 2023-nji ýylyň iýunynda Owganystanyň, Gazagystanyň, Gyrgyzystanyň, Özbegistanyň, Täjigistanyň we Türkmenistanyň toparlarynyň gatnaşmagynda Aşgabatda ikinji gezek geçirilen bu sebit çempionatynyň tennis ýaryşlaryny guramagyň ajaýyp mysalydygyny bellemekleri guwandyryjy ýagdaýdyr. Şeýle hem Aziýanyň Tennis federasiýasynyň şu ýyl geçirilen Baş Assambleýasynda Türkmenistanyň Tennis federasiýasynyň Aziýanyň iň çalt ösýän guramalarynyň biri hökmünde ykrar edilendigini nygtamak gerek.

Ine, bu gün bolsa Aşgabatda has giň gerimli ýaryş — 14 ýaşa çenli ýetginjek oglan-gyzlaryň arasynda tennis boýunça «Ashgabat Open 2024» halkara ýaryşy guralýar. Oňa Beýik Britaniýadan, Hindistandan, Eýrandan, Iordaniýadan, Gazagystandan, Malaýziýadan, Birleşen Arap Emirliklerinden, Pakistandan, Täjigistandan, Türkiýeden, Özbegistandan we Türkmenistandan türgenler gatnaşýarlar. Bu halkara ýaryşy ýokary derejede geçirmek maksady bilen, Türkmenistanyň Bedenterbiýe we sport baradaky döwlet komitetinde ýurdumyzyň degişli ministrlikleriniň, pudaklaýyn dolandyryş edaralarynyň wekillerinden ybarat bolan iş topary döredilip, onuň ýerine ýetirmeli çäreleriniň meýilnamasy tassyklanyldy.

Soňky ýyllarda paýtagtymyz ýokary derejeli ýaryşlary geçirmek üçin ähli zerur şertleri özünde jemleýän, dünýä sportunyň okgunly ösýän merkezi hökmünde halkara giňişlikde uly abraýa eýe bolýar. Aşgabadyň “Arkalaşygyň täze sport mümkinçilikleriniň şäheri” diýlip yglan edilmegi sport jemgyýetçiligi tarapyndan ýurdumyza bildirilýän uly ynamyň, bedenterbiýäni we sporty ösdürmek, wagyz etmek, bu ulgamda halkara hyzmatdaşlygy pugtalandyrmak ugrundaky tagallalaryň ykrar edilýändiginiň nyşanydyr. Mälim bolşy ýaly, bu çözgüt şu ýylyň 24-nji maýynda türkmen paýtagtynda geçirilen GDA-nyň Hökümet Baştutanlarynyň Geňeşiniň nobatdaky mejlisiniň çäklerinde biragyzdan kabul edildi.

Halkara Tennis federasiýasynyň (HTF) prezidenti Dewid Haggertiniň we Aziýanyň Tennis federasiýasynyň (ATF) prezidenti Ýuriý Polskiniň ýurdumyza amala aşyran ilkinji sapary hem Türkmenistanyň sport durmuşynda möhüm waka boldy. Şu ýylyň 27-nji martynda myhmanlar hormatly Prezidentimiz Serdar Berdimuhamedow tarapyndan kabul edildi. Duşuşygyň dowamynda HTF-niň we ATF-nyň Türkmenistan bilen netijeli hyzmatdaşlygy ösdürmäge gyzyklanma bildirýändikleri tassyklanyldy. Şunda ýurdumyzda sporty goldamaga, jemgyýetde sagdyn durmuş ýörelgelerini berkarar etmäge aýratyn üns berilýändigi bellenildi. Jenap Dewid Haggerti Türkmenistanda bu ugurda uly üstünlikleriň gazanylandygyny aýdyp, döwlet Baştutanymyza Halkara Tennis federasiýasynyň güwänamasyny gowşurdy. Şu ýyl Aziýanyň Tennis federasiýasy tarapyndan (ATF) Aşgabat şäherindäki Olimpiýa şäherçesiniň Tennis toplumy «Tennis boýunça Aziýa sebitiniň okuw-türgenleşik merkezi» diýlip yglan edildi. Bu baradaky degişli güwänamany Halkara Tennis federasiýasynyň Aziýa sebiti boýunça jogapkär wekili SeýedAmir Borghei gowşurdy.

Türkmenistanyň başlangyjy boýunça 3-nji iýunyň «Bütindünýä welosiped güni» diýlip yglan edilmegi hem-de Birleşen Milletler Guramasynyň Baş Assambleýasy tarapyndan «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek», «Birleşen Milletler Guramasynyň oýunlary» atly Kararnamalaryň biragyzdan kabul edilmegi ýurdumyzyň sporty ösdürmekde, bedenterbiýe-sagaldyş hereketini giňeltmekde gazanan üstünliklerine dünýä bileleşiginiň berýän ýokary bahasynyň aýdyň güwäsidir.

Tennis boýunça «Ashgabat Open 2024» atly halkara ýaryşyň açylyş dabarasy paýtagtymyzyň Olimpiýa şäherçesiniň desgalarynyň düzümine girýän Tennis toplumynda guraldy. Bu toplum türkmen halkynyň Milli Lideri Gurbanguly Berdimuhamedowyň başlangyjy bilen Ýapyk binalarda we söweş sungaty boýunça V Aziýa oýunlaryny geçirmek üçin gurlupdy. Merkezi Aziýa sebitindäki bu iri desgalar toplumy halkara sport ýaryşlaryny geçirmek, türgenleriň, öz saglyklaryny berkitmek isleýän islendik adamyň türgenleşikleri geçirmekleri üçin hyzmat edýär.

Şu gün Olimpiýa şäherçesiniň 4 müň orunlyk sport toplumyna köp sanly tomaşaçylar ýygnandy we bu ýerde baýramçylyk ýagdaýy emele geldi. Hemmeler çäräniň başlanýandygyny alamatlandyrýan açylyş dabarasyna sabyrsyzlyk bilen garaşýar. Sport toplumynyň meýdançasyna ýaryşa gatnaşyjy ýurtlaryň Döwlet baýdaklary we olaryň atlary ýazylan ýazgylar getirilýär. Resmi açylyş dabarasy badalga alýar.

Dabaraly ýagdaýda hormatly Prezidentimiz Serdar Berdimuhamedowyň Gutlagy okalýar. Onda sporta gadymy döwürlerden bäri parahatçylygyň we dostlugyň nyşany hökmünde garan ata-babalarymyzyň asylly ýoluny dowam etdirip, ýurdumyzda sportuň dünýä ýurtlary bilen hyzmatdaşlygyň möhüm ugry, halklaryň arasynda dostlukly gatnaşyklary berkitmegiň ählumumy serişdesi hasaplanýandygy bellenilýär. «Eziz Diýarymyzyň sport taryhynda möhüm waka boljak bu ýaryşyň sport ulgamynda halkara hyzmatdaşlygy pugtalandyrmaga, parahatçylygy we dostlugy dabaralandyrmaga, Olimpiýa hereketiniň ýörelgelerini wagyz etmäge hem-de ornaşdyrmaga, tennis boýunça ýaş türgenleriň ussatlyklaryny, tejribelerini artdyrmaga uly goşant goşjakdygyna berk ynanýaryn» diýip, döwlet Baştutanymyz Gutlagynda nygtady hem-de «Ashgabat Open 2024» halkara ýaryşynyň sport baýramçylygy ruhunda geçirilýän günlerinde daşary ýurtly myhmanlaryň türkmen halkynyň myhmansöýerligi bilen ýakyndan tanyşjakdyklaryna we olaryň kalbynda güneşli ýurdumyz hakynda ýakymly duýgularyň galjakdygyna berk ynam bildirdi. Hormatly Prezidentimiziň Gutlagy uly ruhubelentlik bilen diňlenildi we şowhunly el çarpyşmalar bilen garşylanyldy.

Dabaranyň tolgundyryjy pursady gelip ýetýär: tennis boýunça «Ashgabat Open 2024» halkara ýaryşy açyk diýlip yglan edilýär. Türkmenistanyň Döwlet senasy ýaňlanýar. Onuň belent owazy astynda Watanymyzyň mukaddes tugy asmana galdyrylýar.

Soňra Türkmenistanyň Tennis federasiýasynyň başlygy, Aziýanyň Tennis federasiýasynyň wise-prezidenti E.Döwletowa söz berildi. Ol sportuň, hususan-da, tennisiň ösdürilmegine aýratyn üns berýändikleri, şeýle hem bu iri halkara ýaryşy ýokary derejede geçirmäge mümkinçilikleriň döredilendigi üçin hormatly Prezidentimize hem-de Gahryman Arkadagymyza çuňňur hoşallyk bildirip, hemmeleri ýaryşyň başlanmagy bilen gutlady we üstünlikleri arzuw etdi.

Soňra Halkara Tennis federasiýasynyň wekili, tennis boýunça «Ashgabat Open 2024» halkara ýaryşynyň baş emini Mahdi Malekzadä söz berildi. Türkmen tarapynyň ýaryşlary geçirmek üçin iň amatly şertleri, döredendigini şol sanda ajaýyp sport desgalaryny gurandygyny belläp, myhman tennisi ösdürmäge berýän goldawlary üçin hormatly Prezidentimiz Serdar Berdimuhamedowa hem-de türkmen halkynyň Milli Liderine HTF-niň adyndan çuňňur hoşallyk bildirdi.

Dabaranyň resmi açylyşy tamamlanandan soňra, aýdym-sazly sahnalaşdyrylan çykyşlar ýerine ýetirildi. Medeniýet we sungat işgärleri, Çagalar we ýetginjekler köşgüniň topary, “Galkynyş” tans topary, Türkmen döwlet bedenterbiýe we sport institutynyň talyplary öz ussatlyklaryny görkezdiler. Şeýle hem paýtagtymyzdaky sport mekdepleriniň okuwçylary ajaýyp görkezme çykyşlaryny ýerine ýetirdiler.

Elbetde, ähli baýramçylyklarda bolşy ýaly, bu gezekki dabarada hem gadymy “Küştdepdi” tansy ýerine ýetirildi. Döwürleriň we nesilleriň arabaglanyşygynyň özboluşly beýany bolan bu tans diňe bir milli däl, eýsem, dünýä mirasynyň hem aýrylmaz bölegine öwrüldi. ÝUNESKO-nyň çözgüdi esasynda “Küştdepdi” tans dessurynyň Adamzadyň maddy däl medeni mirasynyň sanawyna girizilendigini bellemelidiris. Tomaşaçylaryň ählisiniň bilelikde ýerine ýetirmeginde ýaňlanan «Arkadagly Gahryman Serdarymyza şöhrat!» atly aýdym dabaranyň özboluşly jemlenmesine öwrüldi.

Şeýlelikde, tennis boýunça «Ashgabat Open 2024» halkara ýaryşy badalga aldy. Öňümizde janköýerlere tennis meýdançalaryndaky tolgundyryjy duşuşyklar garaşýar. Bäsleşigi guraýjylar oňa gatnaşyjylar üçin medeni maksatnama taýýarladylar. Onuň çäklerinde myhmanlar «Älem» medeni-dynç alyş merkezine, Janly tebigatyň milli muzeýine, Halkara ahalteke atçylyk sport toplumyna baryp görerler, Olimpiýa şäherçesine gezelenç ederler, «Berkarar», «Aşgabat», «Arkaç» söwda-dynç alyş merkezleri, paýtagtymyzyň beýleki gözel ýerleri bilen tanşarlar.