Hormatly Prezidentimiz Serdar Berdimuhamedow BMG-niň Howanyň üýtgemegi boýunça Çarçuwaly Konwensiýasynyň taraplarynyň nobatdaky 28-nji mejlisindäki (COP28) çykyşynda, Türkmenistan teklip edilýän Howa we Saglyk boýunça Jarnamany goldaýandygyny aýtdy.

«Ählumumy howa başlangyçlarynyň çäklerinde köptaraply hyzmatdaşlygy dowam etmäge doly ygrarly bolmak bilen, Türkmenistan teklip edilýän Howa we Saglyk boýunça Jarnamany goldaýar we Pariž ylalaşygyny durmuşa geçirmekde saglygy goraýyş meselelerinde biziň umumy tagallalarymyzy we bitewüligimizi tassyklamak üçin Jarnamany goldamagy wajyp hasaplaýarys» diýip, döwlet Baştutanymyz nygtady.

Şeýle-de Arkadagly Gahryman Serdarymyz Ählumumy azyk howpsuzlygyny üpjün etmek babatda howanyň üýtgemeginiň täsiriniň örän uludygyny nazara almak bilen, Türkmenistan Durnukly oba hojalygy, Durnukly azyk ulgamlary we howanyň üýtgemegine garşy göreşmek boýunça Emirlikler Jarnamasyny doly goldaýandygyny belledi.

«Türkmenistan howanyň üýtgemegine garşy göreşmek ulgamynda milli hökümetleriň we ýerli häkimiýetleriň arasynda utgaşykly hereketiň möhümdigini ykrar etmek bilen, howanyň üýtgemegine garşy göreşmek boýunça belent maksatly köp derejeli hyzmatdaşlyk üçin СOP28 koalisiýasyny döretmek hakyndaky başlangyjyny goldamaga taýýardyr» diýip, hormatly Prezidentimiz aýratyn ünsi çekdi

Döwlet Baştutanymyzyň belleýşi ýaly, Türkmenistanyň milli bähbitlerini nazara almak bilen, Emirlikler Jarnamasynyň maksatlaryna ýetmek üçin gyzyklanma bildirýän taraplaryň ählisi bilen oba hojalygy, ekologiýa, energetika, maliýe, saglygy goraýyş ulgamlarynda sebit we ählumumy derejelerde hyzmatdaşlygy mundan beýläk-de pugtalandyrmaga taýýardyrys.