Şu gün hormatly Prezidentimiz Serdar Berdimuhamedow «Cifal» kompaniýasynyň prezidenti Žil Remini kabul etdi.

Işewür wagt tapyp duşuşandygy üçin hoşallyk bildirip, döwlet Baştutanymyzy Türkmenistanyň Garaşsyzlyk güni bilen tüýs ýürekden gutlady we türkmen halkyna bagtyýarlyk, abadançylyk arzuw etdi. Žil Reminiň belleýşi ýaly, bu baýramçylyk günlerinde Aşgabatda bolmak uly kanagatlanma duýgusyny döredýär. Şunda Fransiýanyň we tutuş Ýewropanyň işewür toparlarynyň okgunly ösýän Türkmenistan bilen netijeli gatnaşyklary ösdürmäge çalyşýandyklary nygtaldy. Ýurdumyzda oňyn ykdysady hyzmatdaşlyk üçin amatly şertler döredildi.

Hormatly Prezidentimiz Serdar Berdimuhamedow gutlaglar we hoşniýetli arzuwlar üçin minnetdarlyk bildirip, Türkmenistanyň Garaşsyzlygynyň 32 ýyllygynyň baýram edilýän günlerinde myhmany gadymy we myhmansöýer türkmen topragynda mübärekleýändigine şatdygyny aýtdy. Döwlet Baştutanymyz işewüriň Aşgabada şu saparynyň ikitaraplaýyn hyzmatdaşlygyň häzirki ýagdaýyny ara alyp maslahatlaşmaga oňat mümkinçilik döretjekdigini hem-de Türkmenistanyň Fransiýanyň işewür toparlary bilen hyzmatdaşlyk gatnaşyklaryny pugtalandyrmaga ýardam etjekdigini nygtady.

Ýurdumyz Ýewropanyň öňdebaryjy kompaniýalary bilen netijeli hyzmatdaşlyk, aýratyn-da, öňdebaryjy ylmy-tehniki gazananlary we innowasion işläp taýýarlamalary çekmekde gatnaşyklar üçin hemişe açykdyr. Döwlet Baştutanymyz özüni ygtybarly hyzmatdaş hökmünde görkezen «Cifal» kompaniýasynyň ýurdumyzyň öňden gelýän dostudygyny kanagatlanma bilen aýdyp, soňky döwürde hyzmatdaşlygyň oňyn tejribesiniň toplanandygyny, iri möçberli taslamalary durmuşa geçirmekde özara ynanyşmagyň ýola goýlandygyny belledi. Häzirki döwürde fransuz kompaniýalarynyň birnäçesi «Cifal» bilen ysnyşykly hyzmatdaşlykda Türkmenistanda gurluşyk, nebitgaz toplumynda, awiasiýa ulgamynda üstünlikli işleýärler.

Duşuşygyň barşynda Türkmenistanyň daşary ykdysady gatnaşyklary mundan beýläk-de giňeltmäge gönükdirilen daşary syýasy strategiýany durmuşa geçirip, maglumat tehnologiýalary, oba hojalygyny sanlylaşdyrmak, suw tygşytlaýjy we «ýaşyl» tehnologiýalary ulanmak ulgamynda öňdebaryjy daşary ýurt tejribesini çekmäge aýratyn ähmiýet berýändigi nygtaldy. Şundan ugur alyp, türkmen tarapynyň fransuz kompaniýalarynyň gazananlaryny mundan beýläk-de ösdürmäge gyzyklanma bildirýändigi bellenildi we fransuz hyzmatdaşlaryň anyk tekliplerine garamaga taýýardygy tassyklanyldy.

«Cifal» kompaniýasynyň bilelikdäki täze taslamalary amala aşyrmaga gyzyklanma bildirýändigini nygtap, Žil Remi ýolbaşçylyk edýän düzüminiň öz üstüne alan hyzmatdaşlyk borçnamalaryny ýerine ýetirmäge berk eýerjekdigine ynandyrdy.

Duşuşygyň ahyrynda «Cifalyň» prezidenti wagt tapyp kabul edendigi hem-de bildirýän ynamy üçin tüýs ýürekden hoşallyk bildirip, hormatly Prezidentimize berk jan saglyk, Watanymyzyň hem-de halkymyzyň abadançylygy ugrunda alyp barýan giň gerimli işlerinde täze üstünlikleri arzuw etdi.