Onuň Alyhezreti, 

Türkmenistanyň Prezidenti

jenap Serdar BERDIMUHAMEDOWA

Hormatly Serdar Gurbangulyýewiç!

Ozaly bilen, ajaýyp Türkmenistana amala aşyran resmi saparymyzyň barşynda maňa hem-de Özbegistan Respublikasynyň wekiliýetine bildirilen aýratyn üns, tüýs ýürekden myhmansöýerlik üçin hoşallygymy beýan edýärin.

Biz soňky ýyllarda Türkmenistan bilen barha ösdürilýän döwletara gatnaşyklara örän ýokary baha berýäris, bu gatnaşyklar beýleki ýurtlar üçin görelde bolup biler. Biz onuň okgunly ösdürilmegine ileri tutulýan derejede üns berýäris. Şunuň bilen baglylykda, Siziň bilen geçiren ýokary derejedäki oňyn häsiýetli hem-de netijeli gepleşiklerimizi, Strategik hyzmatdaşlygy çuňlaşdyrmak hakynda Jarnama gol çekilmegini çuňňur kanagatlanma bilen belleýärin. Gazanylan ylalaşyklar biziň dost-doganlyk, hoşniýetli goňşuçylyk, hemmetaraplaýyn hyzmatdaşlyk gatnaşyklarymyzy düýpgöter täze derejä çykardy.

Gepleşiklerimiziň dowamynda syýasy, söwda-ykdysady, ulag-logistika, energetika, himiýa, oba we suw hojalygy, medeni-ynsanperwer ulgamlarda, şeýle hem parlamentara dialogy, sebitara gatnaşyklary ösdürmek ugurlarynda gazanylan anyk ylalaşyklar, Serhetýaka söwda zolagynyň gurluşygyna badalga berilmegi, gürrüňsiz, doganlyk özbek we türkmen halklarynyň umumy abadançylygyny üpjün etmekde giň mümkinçilikleri açýar.

Gözelligi babatda deňi-taýy bolmadyk Aşgabatda “Daşkent” seýilgähiniň açylmagyny hem-de maňa “Magtymguly adyndaky Türkmen döwlet uniwersitetiniň hormatly professory” alymlyk derejesiniň berilmegini, ozaly bilen, özbek halkyna goýulýan belent sarpanyň, halklarymyzyň arasyndaky köpasyrlyk dostlugyň aýdyň nyşany diýip hasap edýärin.

Hormatly Serdar Gurbangulyýewiç!

Saparyň dowamynda Siz bilen ylalaşylan hoşniýetli maksatlaryň we meýilnamalaryň, anyk taslamalaryň, maksatnamalaryň doly durmuşa geçirilmeginiň iki doganlyk döwletiň arasynda köpugurly, uzak möhletleýin hyzmatdaşlygyň mundan beýläk-de giňeldilmegine, tutuş Merkezi Aziýa sebitinde durnuklylygyň üpjün edilmegine uly goşant boljakdygyna ynanýaryn.

Pursatdan peýdalanyp, Size berk jan saglyk, maşgala abadançylygyny, jogapkärli döwlet işiňizde uly üstünlikleri, Türkmenistanyň doganlyk halkyna bolsa parahatçylyk, abadançylyk we durnukly ösüş arzuw edýärin.

Hormatlamak bilen,

Şawkat MIRZIÝOÝEW,

Özbegistan Respublikasynyň Prezidenti.