Şu gün Lebap welaýatynyň Türkmenabat şäherinde «Senetçilik we amaly –haşam sungaty dünyä halklarynyň mirasynda» atly halkara festiwaly öz işini dowam etdi. Welaýatyň Taryhy we ülkäni öwreniş muzeýinde guralan senetçilik işleriniň we amaly-haşam eserleriniň Halkara sergisi festiwalyň ikinji gününde hem köp adamly boldy. Bu ýere gelenler Gazagystanyň, Özbegistanyň, Eýranyň, Koreýa Respublikasynyň, Türkiýäniň we Latwiýanyň milli mirasyny şöhlelendirýän eserler bilen tanyşdylar.

Soňra «Senetçilik we amaly-haşam sungaty dünyä halklarynyň mirasynda» atly halkara festiwalyna gatnaşyjylar welaýat kitaphanasynyň mejlisler zalynda geçirilen «Adaty senetçilik we amaly-haşam sungaty dünýä halklarynyň mirasynda» atly ylmy-amaly maslahata gatnaşdylar.

Günüň ikinji ýarymynda welaýat merkeziniň «Türkmeniň Ak öýi» binasynda milli eşikleriň modasynyň görkeziliş dabarasy geçirildi. Dürli ýaşdaky zenanlaryň we çagalaryň milli eşikleriniň özboluşly milli öwüşgünleri, nagyşlary, şaý-sepleriň köp dürli görnüşleriniň sazlaşygy bu çärä gatnaşýan myhmanlarda ýatdan çykmajak täsirler galdyrdy.

Şeýle hem «Senetçilik we amaly – haşam sungaty dünyä halklarynyň mirasynda» atly halkara festiwalynyň çäklerinde şanly waka mynasybetli konsert geçirildi. Medeniýet we sungat ussatlarynyň belent ruha beslenen aýdym-sazly çykyşlary halkara festiwalyna özboluşly baýramçylyk öwüşginini çaýdy.