Şu gün Söwda we daşary ykdysady aragatnaşyklar ministrliginiň wekilleri Dubaý şäherinde geçiriljek (Birleşen Arap Emirlikleri) “EKSPO — 2020” Bütindünýä sergisiniň guramaçylyk komitetiniň ýolbaşçylary bilen göni wideoaragatnaşyk arkaly guralan duşuşyga gatnaşdylar. Hormatly Prezidentimiz Gurbanguly Berdimuhamedowyň belleýşi ýaly, biziň ýurdumyz özara bähbitli hyzmatdaşlyk üçin hemişe açykdyr, şol sebäpli hem daşary ýurtly hyzmatdaşlaryň Watanymyzyň baý ykdysady kuwwaty hem-de häzirki zaman gazananlary, türkmen halkynyň köpasyrlyk özboluşly däp-dessurlary barada aýdyň düşünje almagy üçin ähli mümkinçiliklerden peýdalanmak zerurdyr, giň gerimli halkara sergilere yzygiderli gatnaşylmagy hem muňa gönüden-göni ýardam berýär. Duşuşygyň dowamynda bütindünýä forumyny geçirmek bilen baglanyşykly guramaçylyk meseleleri ara alnyp maslahatlaşyldy. Habar berlişi ýaly, dünýäde emele gelen epidemiologiýa ýagdaýyny hasaba alyp, Türkmenistan “EKSPO — 2020-ni» indiki ýyla geçirmek barada BAE-niň öňe süren başlangyjyny goldady. Şunuň bilen baglylykda, taraplar özara bähbitli gatnaşyklary işjeňleşdirmek hem-de netijeli pikir alyşmalary dowam etmek baradaky garaýyşlary beýan etdiler, şunda häzirki zaman sanly tehnologiýalaryny ulanmak mümkinçiliklerine aýratyn üns berildi. Ýurdumyzyň Dubaýda geçiriljek “EKSPO” gatnaşmagynyň gyzyklanma bildirýän ähli taraplar bilen hyzmatdaşlygyň geriminiň giňeldilmegine, ýurdumyzda öndürilýän harytlaryň daşarky bazarlara işjeň çykarylmagyna, şeýle hem dürli ugurlarda öňdebaryjy dünýä tejribesi bilen tanyşmaga ýardam etjekdigi bellenildi. BAE-niň wekilleri hormatly Prezidentimiz Gurbanguly Berdimuhamedowa däp bolan ikitaraplaýyn dostluk gatnaşyklarynyň hem-de tutuşlygyna umumy abadançylygyň bähbitlerine laýyk gelýän netijeli halkara hyzmatdaşlygyň ösdürilmegine hemmetaraplaýyn ýardam berýändigi üçin tüýs ýürekden hoşallyk bildirdiler.