Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 58-si hasaba alyndy. Daşary ýurt puluna Beýik Britaniýadan, Birleşen Arap Emirliklerinden, Şweýsariýadan, Türkiýeden, Owganystandan, Estoniýadan, Gyrgyzystandan we beýleki ýurtlardan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen az kükürtli ýangyç mazudyny, gidro usulda arassalanan dizel ýangyjyny, binýatlyk ýagy, dizel ýangyjyny, awtobenzini, owganystanly işewürler Seýdiniň nebiti gaýtadan işleýän zawodynda öndürilen dizel ýangyjyny satyn aldylar. Gyýanlynyň polimer zawodynda öndürilen ýokary dykyzlykly polietilen we polipropilen Russiýadan, BAE-den, Gonkongdan we beýleki ýurtlardan gelen telekeçileriň geleşikleriniň esasyny düzdi. Bulardan başga-da, Türkiýeden, Birleşen Arap Emirliklerinden, Gonkongdan, Owganystandan, Özbegistandan gelen telekeçiler daşary ýurt puluna reňksiz aýna, portlandsement, lukmançylyk maksatly serişdeleri, nah ýüplügi, pagta süýümini, awtoulaglary satyn aldylar. Geleşikleriň jemi bahasy ABŞ-nyň 156 million 951 müň dollaryndan gowrak boldy. Manat serişdelerine Hytaýdan, Beýik Britaniýadan, Owganystandan gelen işewürler jemi bahasy 7 million 671 müň manatlykdan gowrak nah ýüplük we lukmançylyk maksatly serişdeleri satyn aldylar. Ýurdumyzyň telekeçileri içerki bazar üçin bahasy 338 müň manatlyk pagta süýümini satyn aldylar.