“FAVO” toparyndan bolan belli nemes sazandalary Falk Braýtkroýs we Folker Şlott, şeýle hem Belgiýadan gelen tanymal sazanda Sander de Winne paýtagtymyzyň ilatyny we myhmanlaryny jaz owazlary bilen begendirdiler. Türkmenistanyň Medeniýet ministrligi tarapyndan Germaniýa Federatiw Respublikasynyň ilçihanasy bilen bilelikde guralan konsert diňe jaz sazynyň diňleýjileri we muşdaklary üçin däl-de, eýsem iki döwletiň arasyndaky döredijilik gatnaşyklaryny ösdürmäge goşantlaryny goşan sazandalaryň özi üçin hem ajaýyp sowgat boldy. “Watan” kinokonsert zalynyň sahnasynda daşary ýurtly sazandalar öz eserleri bilen bir hatarda tomaşaçylary Bobbi Makferriniň, Ariel Ramiresiň, Çik Korianyň eserleriniň kawer-görnüşleri bilen tanyşdyrdylar. Agşamyň maksatnamasynda jaz sungaty boýunça türkmen sazandalary hem nemes kärdeşleri bilen bilelikde “Älemgoşaryň belentliginde” atly nusgawy aýdymy we “Bu Maskarad” eserini ýerine ýetirdiler. Tomaşaçylaryň goldaw bermeginde ýurdumyzda örän meşhur bolan “Aýly agşam” aýdymy ýerine ýetirildi. Bu çykyşlar diňleýjileriň şowhunly el çarpyşmalary bilen garşylanyldy.